എന്റെ പെണ്ണുകാണലുകൾ

20 മിനിറ്റില്‍ നമ്മള്‍ കൊച്ചിന്‍ ഇന്റര്‍നാഷണല്‍ എയര്‍പോര്‍ട്ടില്‍ എത്തിച്ചേരും എന്ന എയര്‍ ഹോസ്റെസ്സിന്റെ മെസ്സേജ് കേട്ടാണ് ഞാന്‍ ഉണര്‍ന്നത്…

തികച്ചും അപ്രതീക്ഷിതമായിരുന്നു ഈ നാട്ടിലേക്കുള്ള യാത്ര, ഇന്നലെ ഒറ്റ ദിവസം കൊണ്ട് പ്ലാന്‍ ചെയ്തത് …

ഓരോ ജോലി മാറ്റത്തിലും ഞാന്‍ ആഗ്രഹിച്ച ഒന്നാണ് എല്ലാ വാരാന്ത്യവും നാട്ടില്‍ പോയി വരാന്‍ പറ്റുന്ന ഒരു ഓഫര്‍ …

കിട്ടുന്നതിലോ വര്‍ഷത്തില്‍ ഒരിക്കല്‍ തന്നെ ലീവ് കിട്ടിയാല്‍ കിട്ടി…

പക്ഷെ ഈ യാത്ര ഒരു വീക്ക്‌ എന്ടിലുള്ള പോയിവരവാണ് …

രണ്ട് പകലും ഒരു രാത്രിയും ഉണ്ട് നാട്ടില്‍…..

ഇതില്‍ 2 പെണ്ണ് കാണലും ഒരു മാമോദീസയും നേരത്തെ തന്നെ ഷെഡ്യൂള്‍ഡ് ആണ്..

ബാക്കി സമയം മൂന്നാറിലേക്ക് അല്ലെങ്കില്‍ ഗവിയിലേക്ക് ഒരു ട്രിപ്പ്‌ എന്നൊക്കെ ചിന്തിച്ചിരിക്കെ ഫ്ലൈറ്റില്‍ ആകെ ഒരു കുലുക്കം…

Read More

കേട്ടുകേള്‍വി

ജോജു, അവനെ ഞാന്‍ പ്രത്യേകിച്ച് പരിചയ പെടുത്തേണ്ടതില്ല …
നമ്മുടെ ഒക്കെ വിദ്യാഭ്യാസ കാലഘട്ടത്തില്‍ … നമുക്കൊക്കെ സുപരിചിതനായ ഒരുവന്‍ …
അവന്‍ വളരെ ആത്മാര്‍ത്ഥതയോടെ …നിഷകളങ്കതയോടെ .. പറയുന്നതും പ്രവര്‍ത്തിക്കുന്നതും ആയ കാര്യങ്ങള്‍ പക്ഷെ ആന മണ്ടത്തരങ്ങളായിരിക്കും …
ഒരിക്കല്‍ ഇത്തരം മണ്ടത്തരങ്ങള്‍ കാണിച്ചു കൂട്ടിയാല്‍ പിന്നീട് അവന്‍ മനസ്സാ… വാചാ.. കര്‍മ്മണാ … അറിയാത്ത പല കഥകളും അവന്റെ പേരില്‍ പുറത്തിറങ്ങും… അല്ലെങ്ങില്‍ ഇറക്കും…
പക്ഷെ ഈ കഥ അത് ജോജുവിന്റെ സ്വന്തം….
നീന്തല്‍ അറിയാത്ത ജോജു ഒരിക്കല്‍ വഞ്ചിയില്‍ യാത്ര ചെയ്യുകയായിരുന്നു….
വഞ്ചി പെട്ടന്ന് മറിഞ്ഞു… ജോജു വെള്ളത്തിലേക്കും…
മുങ്ങി താന്ന് കൊണ്ടിരുന്ന അവന്‍ ഒരു മീന്‍ പോകുന്ന കണ്ടു…
ആ മീനിനെ പിടിച്ച് കരയിലേക്ക്‌ എറിഞ്ഞു ജോജു വിളിച്ചു പറഞ്ഞു….
” ഞാനോ മുങ്ങി ചാകും.. നീ എങ്കിലും പോയി രക്ഷപെടൂ …. “

ആദാമിന്റെ വാരിയെല്ല്


ഇന്നലെ നേരത്തെ കിടന്നതുകൊണ്ടാണെന്നു  തോന്നുന്നു എഴുന്നേല്ക്കാന്‍ നല്ല മടി.. 

അലാറം ഒരിക്കല്‍ കൂടി സ്നൂസ് ചെയ്ത കിടന്നു.. 10 മിന്റ്റ് കഴിഞ്ഞതും വീണ്ടും മരണ മണി മുഴങ്ങി….   ഇനി രക്ഷയില്ല..
 
 വൈകിയാല്‍ പ്രശനമാകും..  9 മണിക്ക് പ്രൊജക്റ്റ്‌ ഡിസ്കഷന്‍ ഉള്ളതാണ്..  
 
അല്ലായിരുന്നെങ്കില്‍ എന്തെങ്ങിലും പറഞ്ഞു ഒരു  സിക്ക്‌ ലീവ് എടുക്കായിരുന്നു…ഇതൊന്നും പറഞ്ഞിരിക്കാന്‍ സമയം ഇല്ല.. ഞാന്‍ ബാത്ത് റൂമിലേക്ക്‌ ഓടി… 
 
പാതി മയക്കത്തില്‍ ആണ് പല്ല് തേക്കുന്നത്… തേപ്പിന്റെ  വേഗത കൂടിയപ്പോള്‍ കൈ തെറ്റി ബ്രേഷ്‌ മോണയില്‍ ഇടിച്ചു..പ്രാണന്‍ പോകുന്ന വേദന …  അങ്ങനെ ശരിക്കും ഉറക്കത്തില്‍ നിന്ന് ഉണര്‍ന്നു… 
 
2 മിനിറ്റ് ഒന്നും ചെയ്യാതെ വെറുതെ നിന്നു …ഒടുവില്‍ തേച്ചുകഴിഞ്ഞു  പൈപ്‌ ഓണ്‍ ചെയ്തപ്പോള്‍ ആണ് അറിയുന്നത് പൈപ്പില്‍ വെള്ളമില്ലെന്ന് … 
 
ഇങ്ങനെ ഒരിക്കല്‍ പോലും ഈ ഫ്ലാറ്റില്‍ ഉണ്ടായിട്ടില്ല.. അതുകൊണ്ട്  വെള്ളം കരുതി വെച്ചിട്ടും ഇല്ല …
 
ശെടാ.. ഇനി എന്ത് ചെയ്യും … 6.40 വരെ വെള്ളം ഉണ്ടായിരുന്നിരിക്കണം കാരണം കറിയാച്ചന്‍ ഓഫീസില്‍ പോയിട്ടുണ്ട്.
 
അവന്‍ പോയതിനു ശേഷമാണ് ഞാന്‍ ഉണരുന്നത്…അതോ അവന്‍ പല്ലുപോലും തേക്കാതെ ആണോ പോയേക്കുന്നത്.. ആ .

ഞാന്‍ എന്താണെങ്കിലും  വാങ്ങി വെച്ചിരിക്കുന്ന കുടിവെള്ളത്തില്‍ തന്നെ വാ കഴുകി  …

കുറച്ചു നേരം കാത്തിരിക്കാം വരുമായിരിക്കും… ഒരു ചായ കുടിച്ചിട്ടാകാം ബാക്കി…

കടുപ്പത്തില്‍ ഒരു ചായ ഇട്ടു.. ഗ്ലാസ്സിലേക്ക് പകര്‍ന്നു..

ബെസ്റ്റ്‌… ..പഞ്ചസാര നോക്കിയപ്പോള്‍ അതും  തീര്‍ന്നിരിക്കുന്നു.. 

വിളിച്ചുപറഞ്ഞു പഞ്ചസാര കൊണ്ടുവരുമ്പോള്‍ ഒരു സമയം ആകും…  അതിനു ഇനി  മെനക്കെടുന്നില്ല…
 
അല്ലെങ്കിലും ഈ ഇടയായി ഇത്തിരി പഞ്ചാര കൂടുതലാ…. ആരെയോ പ്രാകിക്കൊണ്ട് ചായ ഒരുതരത്തില്‍ കുടിച്ചോപ്പിച്ചു..
 
8 മണിയായി .. വെള്ളം വരുന്നതിന്റെ ഒരു ലക്ഷണം പോലും ഇല്ല..  CTO യെ വിളിച്ചു കാര്യം പറയാം എന്നിട്ട് ഹാഫ് ഡേ ലീവ് എടുക്കാമെന്ന് കരുതി..
 
ഇന്ന് മീറ്റിംഗില്‍ ക്ലൈന്റ്സ് കൂടി ഉണ്ടാകും ..എന്താനെങ്ങിലും 9 നു തന്നെ എത്തണം എന്ന്…ഇത് പുള്ളി മനപൂര്‍വം ചെയ്തതാ…. പലപ്പോഴും ശനിയാഴ്ച  ജോലിക്ക്  വരാന്‍ പറഞ്ഞപ്പോള്‍ ഞാന്‍ പറ്റില്ലെന്ന് പറയുന്നതിന്  ….
 
ആ അങ്ങേരുടെ കമ്പനിയായിപ്പോയി അല്ലെങ്കില്‍ കാണായിരുന്നു ….

ഈ കാത്തിരിപ്പില്‍ ഉച്ചഭക്ഷണം എടുത്ത് വെക്കാനും മറന്നു…

ഉം .. … എന്താണെങ്കിലും ഒരു ബോട്ടില്‍ വെള്ളം ഉണ്ട്  ..ഇതുകൊണ്ട് കുളിയും ജപവും കഴിക്കാം..
 
ഒരു ഗതികേട്‌ നോക്കണേ.. പാലിനേക്കാള്‍ കൂടുതല്‍ വിലക്ക് വാങ്ങി വെച്ചിരിക്കുന്ന കുടിവെള്ളത്തില്‍ കുളിക്കേണ്ടിവരുന്നത് ….
 
കുളി കഴിഞ്ഞ് തിരക്കിട്ട് ഓഫീസില്‍ എത്തിയപ്പോള്‍ 9.30 ..മീറ്റിംഗ് നു എല്ലാവരും  തയ്യാര്‍ ആയി ഇരിക്കുന്നു ..
 
ഞാന്‍ തിരിക്കിട്ട് കയറി വരുന്നത്‌ കണ്ടപ്പോഴെ  CTO യുടെ മുഖത്ത് എനിക്കൊരു പണി തന്നതിന്റെ സന്തോഷം തെളിഞ്ഞുവരുന്നത് ഞാന്‍ കണ്ടു…
 
സാധാരണ ഓഫീസില്‍ എത്തിയിട്ടാണ് പ്രഭാത ഭക്ഷണം കഴിക്കുന്നത്..

ഇന്ന് നേരേ മീട്ടിങ്ങിലേക്ക് കയറിയകൊണ്ട് അത് മുടങ്ങി…  കഴിഞ്ഞതിനുശേഷം എന്തെങ്കിലും ഓര്‍ഡര്‍ ചെയ്തു  കഴിക്കാമെന്ന് കരുതി… 

ഞാന്‍ ഒന്നും കഴിച്ചിട്ടില്ലെന്നു ആരോ ചോര്‍ത്തി കൊടുത്തിട്ടുണ്ട്… അല്ലെങ്കില്‍ ഒരു മണിക്കൂര്‍ കൊണ്ട് തീര്‍ക്കാറുള്ള മീറ്റിംഗ് ദേ  11.30  ആയിട്ടും തീര്‍ന്നിട്ടില്ല…
 

ഇനി ഇപ്പോള്‍ പ്രഭാത ഭക്ഷണവും ഉച്ച ഭക്ഷണവും ഒരുമിച്ച് അല്പം നേരത്തെ കഴിച്ചു കളയാം എന്നാക്കി  പ്ലാന്‍…

എന്റെ പ്ലാന്‍ മാത്രം ഉണ്ട്… ഇവര്‍ ചോദ്യങ്ങള്‍ ചോദിച്ചുകൊണ്ടേ ഇരിക്കുന്നു… ഇത് അങ്ങനെ വേണം …അത് ഇങ്ങനെ വേണം… 

ഞാന്‍ എല്ലാം ഇപ്പോ ശരിയാക്കി തരാം എന്ന് പറഞ്ഞു കൊണ്ടിരുന്നു… 

പഞ്ചസാര ഇടാത്ത ഒരു ചായ … അത് എപ്പോഴേ ആവിയായി… വിശന്നിട്ട് കണ്ണ് കാണാന്‍ വയ്യ… ആര്‍ക്കറിയാം ഇതൊക്കെ ചെയ്തു  കൊടുക്കാന്‍ പറ്റുമോ എന്ന്… 

ആദ്യം ഈ മീറ്റിംഗ് ഒന്ന് തീര്‍ത്തിട്ട് അതിനേക്കുറിച്ച്‌  ചിന്തിക്കാം… ഈ ഒരു ചാണ്‍ വയറിന്റെ വിശപ്പകറ്റാന്‍ ആണല്ലോ നമ്മള്‍ ഈ പെടാപാട് പെടുന്നത്….

എന്തിനു ഏറെ പറയുന്നു മീറ്റിംഗ് തീര്‍ന്നപ്പോള്‍ 2.30 ..

ഫുഡ്‌ ഓര്‍ഡര്‍ പോലും ചെയ്തിട്ടില്ല..

എല്ലാവരും കഴിച്ചു കഴിഞ്ഞു… ഞാന്‍ സ്ഥിരം ഓര്‍ഡര്‍ ചെയ്യാറുള്ള കോലം ഹോട്ടലില്‍ വിളിച്ചു ഊണ് പറഞ്ഞപ്പോള്‍ … അവിടെ ഊണ് ഇല്ല… 

ചപ്പാത്തിയും കറിയും ഉണ്ടെന്… അതെങ്കില്‍ അത്… വിശന്നിരിക്കുമ്പോള്‍ ഒണക്ക ചപ്പാത്തി കഴിക്കാന്‍ എന്ത് രസമാണെന്നോ… 

ഇന്ന് ഞാന്‍ ഇടത്തൂടെ ആണോ അതോ വലതൂടെ ആണോ എഴുന്നേറ്റത്‌  .. വശത്തിന്റെ ആകാന്‍ വഴിയില്ല…കണ്ണാടിയില്‍ ആകും നോക്കിയത്… 

നല്ല കണി…. 

പകുതി ദിവസത്തില്‍ കൂടുതല്‍ മീറ്റിങ്ങില്‍ പോയതിനാല്‍ ഇന്നേക്ക് തീരുമാനിച്ച അത്യാവശ്യ കാര്യങ്ങള്‍ പലതും തിരക്കിട്ടാണ് ചെയ്തു തീര്‍ത്തത്..

മാതൃഭൂമി.. മനോരമ .. ബ്ലോഗുകള്‍.. ഒന്നും വായിച്ചിട്ടില്ല… ആ… ഇന്നത്തെ പത്രം നാളെ വായിക്കാം… 

അങ്ങനെ ഇന്നത്തെ ഗുസ്തി അവസാനിപ്പിച്ചു ഓഫീസില്‍ നിന്നിറങ്ങി… വീട്ടിലേക്കുള്ള യാത്ര… 

വീട്ടില്‍ ചെല്ലുമ്പോള്‍ വെള്ളം ഉണ്ടാകുമോ ആവോ… വന്നിട്ടുണ്ടാകും.. എന്നെ രാവിലെ ബുദ്ധിമുട്ടിക്കുക എന്നൊരു വാശിയേ അതിനു കാണുകയുള്ളൂ… 

ഇതൊക്കെ ചിന്തിച്ചു വണ്ടി ഓടിക്കുന്നതിനിടയില്‍ ആണ് വണ്ടിയില്‍ പെട്രോള്‍ ഇല്ലാത്തതിന്റെ ലൈറ്റ് മിന്നി മിന്നി കത്തുന്നത് കണ്ടത്… 

രാവിലെ വരുന്ന വഴിയില്‍ അടിക്കാമെന്ന് ചിന്തിച്ചിരുന്നതാണ് .. രാവിലത്തെ ആഘോഷങ്ങളില്‍ പങ്കെടുത്തകൊണ്ട് അതിനു പറ്റിയില്ല… 

ദൈവമേ… ഇന്നത്തെ ദിവസത്തിന്റെ ഒരു കിടപ്പുവശം നോക്കിയാല്‍ …ഇത് വഴിയില്‍ കിടക്കും… പോലീസ്സ് വരും 500 Dhs ഫൈനും തരും  … 

മൂന്ന് നാല് കിലോ മി. കഴിഞ്ഞാല്‍ പെട്രോള്‍ പമ്പ് ഉണ്ട്  എങ്ങിലും അവിടെ വരെ എത്താന്‍ ടൈം എടുക്കും നല്ല ട്രാഫിക്‌ ഉണ്ട്…ഞാന്‍ എ.സി ഓഫ്‌ ചെയ്തു…  വൈകുന്നേരം ആണെങ്കിലും നല്ല ചൂടുണ്ട് .. വിയര്‍ത്തും തുടങ്ങി… 

ഒരു വിധത്തില്‍ പമ്പില്‍ എത്തി… ഹോ സമാധാനമായി…  പെട്രോള്‍ അടിച്ചു .. 

റൂമില്‍ എത്തി.. വെള്ളവും ഉണ്ട്… എത്ര സുന്ദരമായ ദിവസം അല്ലേ ?? … 

ഇങ്ങനെ, ചില ദിവസങ്ങള്‍ ചിലപ്പോള്‍ നരക തുല്യം ആകാറുണ്ട്… 

അല്ലെങ്കിലും ഏദന്‍ തോട്ടത്തില്‍ നിന്ന് പറുദീസയിലേക്ക് അല്ലല്ലോ …അനുഭവിപ്പിക്കാനായി ഈ ഭൂമിയിലേക്കല്ലേ ഇറക്കി വിട്ടത്‌… 

എന്തിന്, ഹവ്വാ യെ പറഞ്ഞാ മതിയല്ലോ… ആ ഒരേയൊരു മരത്തിന്റെ പഴം കഴിക്കരുതെന്ന ഒറ്റ തടസ്സമല്ലേ ദൈവം പറഞ്ഞുള്ളൂ…

ഒരു അല്ലലും ഇല്ലാതെ കണ്ണില്‍ കണ്ടത്‌ എന്തും തിന്നും ആസ്വദിച്ചും നടക്കാമായിരുന്നില്ലേ … ജോലിക്ക് പോകണ്ട.. തുണി അലക്കണ്ട .. എന്തിനു കാറില്‍ പെട്രോള്‍ പോലും

അടിക്കണ്ടായിരുന്നു… 

ആ പഴം തിന്നു ദൈവത്തെക്കാള്‍ വലിയവര്‍ ആകാനുള്ള അത്യാര്‍ത്തി അല്ലെ… അനുഭവിക്ക് …. ഇനീം അനുഭവിക്ക് …

വാല്ക്കഷണം :
എല്ലാ ഫെമിനിസ്റ്റുകളോടും മാപ്പ് ….

©Lajeev Kalappattil

Thank you for reading malayalam blogs Kalappadan

അങ്കം… അല്ല …ഒന്നൊന്നര അങ്കം

യു. എ.ഇ യില്‍ ഡ്രൈവിംഗ് ലൈസെന്‍സ് എടുക്കുക എന്നത് ഒരു ഡിഗ്രി സ്വന്തമാക്കുന്നതിനേക്കാള്‍ ബുദ്ധിമുട്ടാണ് എന്ന് മനസ്സിലാക്കി തന്നെയാണ് ഞാനും ഈ അങ്കത്തിന് പുറപ്പെടുന്നത് .. എങ്കിലും ഇത് ഒരു ഒന്നോന്നര അങ്കം ആയി പോയി…
ഡ്രൈവിംഗ് ലൈസെന്‍സ് കിട്ടിയകൊണ്ട് എന്നെ കമ്പനിയുടെ മാനേജര്‍ ആക്കുമെന്ന വ്യാമോഹം ഒന്നും എനിക്ക് ഉണ്ടായിരുന്നില്ല…

ഭാവി ജീവിതം ഭാസുരമാക്കാന്‍ ഒരു ലൈസെന്‍സ് നല്ലതാണെന്ന ഒരു തോന്നല്‍ .. അത്‌ .. അതുമാത്രമാണ് എന്നെ ഈ വഴിയിലേക്ക്‌ നടത്തിയത്…

പക്ഷെ ഇതൊരു കുരിശിന്റെ വഴി ആയിരിക്കുമെന്ന് ഞാന്‍ കരുതിയതേയില്ല..

മനുഷ്യ കുലത്തിന്റെ പാപ പരിഹാരതിനുവേണ്ടിയാണ് ദൈവപുത്രന്‍ പീലാത്തോസിന്റെ ഭവനം മുതല്‍ ഗാഗുല്‍ത്താ വരെ കുരിശ്‌ ചുമന്നതെങ്കില്‍ … പാപിയായ ഞാന്‍ ആരുടെ നന്മക്ക് വേണ്ടിയാണോ ഈ കുരിശ്‌ ചുമക്കെണ്ടിവന്നത് ??

ഡ്രൈവിംഗ് ക്ലാസ്സുകള്‍ക്ക്, വീട്ടില്‍ വന്നു വിളിച്ചോണ്ട് പോയി, ക്ലാസ്സ്‌ എടുത്ത്‌ തിരിച്ചു കൊണ്ട് വിടുന്ന പ്രൈവറ്റ് സ്ഥാപനങ്ങള്‍ ഉണ്ടായിട്ടും ഗവണ്മെന്‍റ് സ്ഥാപനം ആയതുകൊണ്ട് ഒരു ദിവസം നേരത്തെ കിട്ടിയാല്‍ അത്രയും ചെലവ് കുറയുമല്ലോ എന്നോര്‍ത്താണ് ഞാന്‍ അവിടെ ചേര്‍ന്നത്…

പക്ഷെ അറിയുന്ന പോലീസ് രണ്ടടി കൂടുതല്‍ എന്ന് പറഞ്ഞപോലെ ആയിരുന്നു എന്റേത്…

അപേക്ഷിച്ച് ആറു മാസങ്ങള്‍ക്ക്‌ ശേഷമാണ് തിയറി ക്ലാസ്സിനു വിളിച്ചത്…

തിയറി ക്ലാസ്‌ അഞ്ചു ദിവസമാണ് … ഒരു ദിവസം മുടങ്ങിയാല്‍, മുടങ്ങുന്ന അതെ ദിവസം തന്നെ അടുത്ത ആഴ്ചയില്‍ അറ്റന്‍ഡ് ചെയ്താലേ പരീക്ഷക്ക്‌ ഇരുത്തു എന്നാണ് നിയമം…

പണ്ടേ ഞാന്‍ കൃത്യമായി ക്ലാസ്സില്‍ കയറാര്‍ ഉണ്ടല്ലോ… ഓരോരോ നിയമങ്ങളെ..

ആ.. ഞാനും കിട്ടിയ പുസ്തകവും ആയി ക്ലാസിനു പോയി.. ക്ലാസിനു പോയപ്പോള്‍ ആണ് ഇത് അത്ര എളുപ്പമുള്ള പരുപാടി അല്ല എന്ന് മനസ്സിലായത്‌ … നാട്ടില്‍ മഷി ഇട്ട് നോക്കിയാ ഒരു സിഗ്നല്‍ ബോര്‍ഡ്‌ കാണാന്‍ സാധിക്കില്ല.. അവിടെ ഓടിച്ചു ശീലിച്ച ഞാന്‍ ഇതിനുമാത്രം സിഗ്നല്‍ ഒക്കെ നോക്കി വണ്ടി ഓടിക്കണോ ?

ഏതായാലും രജി. ഫീസും തിയറി ക്ലാസ്സ്‌ ഫീയും എല്ലാം കൂടി 750 Dhs. ഇപ്പോഴേ കൊടുത്ത് കഴിഞ്ഞു.. വേറെ എന്തുചെയ്യാന്‍….

ഇതൊക്കെ പഠിക്കണോ അതോ നാട്ടിലെ പോലെ ചോദ്യ പേപ്പറില്‍ തന്നെ ഉത്തരങ്ങള്‍ മാര്‍ക്ക്‌ ചെയ്തിട്ടുണ്ടാകുമോ എന്ന് അന്യോഷിച്ചു …

ഇല്ല …25 ല്‍ 19 എണ്ണം ശരിയാകാതെ പാസ്സ് ആകില്ലെന്നും ആകുന്നത് വരെ ഓരോ പരീക്ഷക്കും 100 Dhs വീതം കെട്ടണമെന്നും കേട്ടപ്പോള്‍ പഠിച്ചു പരീക്ഷ എഴുതി ശീലമില്ലാത്ത ഞാന്‍ ഒന്ന് ഞെട്ടി…

പഠിക്കാന്‍ തന്നെ തീരുമാനിച്ചു… അല്ലാതെ എന്ത് ചെയ്യാന്‍ നനഞ്ഞു ഇറങ്ങിയില്ലേ .. ഇനി കുളിച്ചു കയറാം..മൈക്രോ പ്രോസ്സസര്‍ ക്ലാസില്‍ പോലും ഇത്രക്ക്‌ ശ്രദ്ധിച്ചിരുന്നിട്ടുണ്ടാകില്ല …അതുകൊണ്ട്തന്നെ ജീവിതത്തില്‍ ആദ്യമായി കോപ്പിയടിക്കാതെ ഒരു പരീക്ഷ ഞാന്‍ പാസ്സ് ആയി …റാങ്ക് ഉണ്ടായിക്കാണാനും സാധ്യത ഉണ്ട്‌ ..

പിറ്റേദിവസം പ്രാക്ടിക്കല്‍ ക്ലാസ്സ്‌ തുടങ്ങും എന്ന് കരുതി ചെന്ന എന്നോടുപറഞ്ഞു .. നല്ല തിരക്കുകള്‍ ഉള്ളതിനാല്‍ 2 മാസം കഴിയും നിങ്ങളെ വിളിക്കാന്‍ … വിളിചിട്ട് വന്നാല്‍ മതി എന്ന്…

വീണ്ടും കാത്തിരിപ്പ്‌ … പ്രാക്ടിക്കല്‍ ക്ലാസ്സുകള്‍ക്കായ് …

ഓഫീസില്‍ ഞങ്ങള്‍ ഒന്നുരണ്ട് പേര്‍ ഈ യജ്ഞത്തില്‍ ആണ്..

എനിക്ക് ശേഷം പ്രൈവറ്റ് സ്കൂളില്‍ ചേര്‍ന്ന ബിന്‍സ് ..അവന്‍ തിയറിയും പാസ്സ് ആയി പ്രാക്ടിക്കല്‍ ക്ലാസ്സിനു പോയിത്തുടങ്ങി… അവനോടു ഞാന്‍ അന്നെ പറഞ്ഞതാ പ്രൈവറ്റ് വേണ്ട ഗവ. മതി എന്ന്… അനുഭവിക്ക് നീ.. അല്ല ഞാന്‍…..

2 മാസം കഴിഞ്ഞു.. 3 മാസം കഴിഞ്ഞു… ഒരു വിളിയും ഇല്ല… എനിക്ക് എന്തെങ്കിലും ഒക്കെ വിളിക്കാനാ തോന്നിയത്‌….

അവര്‍ വിളിച്ചിട്ട് ക്ലാസ്സിനു പോയി എനിക്ക് ലൈസെന്‍സ് കിട്ടില്ല എന്ന് മനസ്സിലായതുകൊണ്ട്‌ ഞാന്‍ തന്നെ ഒന്നിറങ്ങി അന്യോഷിക്കാമെന്നു കരുതി …

അവിടെ ചെന്ന് കാര്യം പറഞ്ഞു.. 3500 Dhs അടച്ചാല്‍ നാളെ മുതല്‍ ക്ലാസുകള്‍ തുടങ്ങാം എന്ന് അവര്‍ അറിയിച്ചു ..

എന്നാ പിന്നെ ഇത് നേരത്തെ ചെയ്യാമായിരുന്നല്ലോ … പോയ ബുദ്ധി ആന പിടിച്ചാ കിട്ടില്ലല്ലോ…. പിന്നാ ഞാന്‍ …

അര മണിക്കൂര്‍ വീതമുള്ള 50 ക്ലാസ്സുകള്‍ക്കാണ് ഈ പറഞ്ഞ കാശ് …. ഇതിനുള്ളില്‍ പാര്‍കിംഗ് , പ്രീ. ടെസ്റ്റ് , ഫൈനല്‍ ടെസ്റ്റ് എന്നീ കടമ്പകള്‍ കടക്കണം.. ഇല്ലെങ്ങില്‍ പിന്നീടുള്ള ഓരോ 10 ക്ലാസ്സിനും 600 Dhs വീതം…

നാട്ടില്‍ വണ്ടി ഓടിക്കാന്‍ അറിയാവുന്നതുകൊണ്ട് എനിക്ക് 10 ക്ലാസ്സുപോലും വേണ്ടല്ലോ… പിന്നെ എന്തിനാ എക്സ്ട്രാ ക്ലാസ്സിനെ കുറിച്ചൊക്കെ ചിന്തിക്കുന്നേ…

ആജ്ഞ പോലെ ഫീസ്‌ അടച്ചു …. ക്ലാസും തുടങ്ങി..ഓഫീസു വിട്ട് നേരെ ഡ്രൈവിംഗ് ഇന്‍സ്ടിട്ടുട്ടിലെക്ക് … ഓഫീസില്‍ നിന്ന് ടാക്സിയില്‍ ആണ് അവിടേക്ക പോകുന്നത്… ദൂരം കുറച്ചൊന്നുമല്ല… 24 dhs വേണം… ഒരു വശത്തേക്ക്‌ … പോകുന്ന വഴിയില്‍ ആണ് കൂടെ ജോലി ചെയ്യുന്ന ഐശ്വര്യ താമസിക്കുന്നത്‌ ..അവളെയും കൂടെ കൂട്ടി… ചേതമില്ലാത്ത ഒരു ഉപകാരം… അതുമല്ല പേരിന്റെ എങ്ങിലും ഐശ്വര്യം ടെസ്ടിനു ഉപകരിച്ചാലോ ?

ഒരു കാസര്‍ഗോഡ്കാരന്‍ മുനീര്‍ ആണ് ഇന്‍സ്ട്രക്ടര്‍ … ഞാന്‍ ആണെങ്കില്‍ ആദ്യമായി ഷാര്‍ജ തെരുവീഥികളിലൂടെ വണ്ടി ഓടിക്കാമെന്ന തൃല്ലിലും.. പാര്‍ക്കിഗ് ടെസ്റ്റ് പാസ്സാകുന്നതുവരെ യാര്‍ഡി ലാണ് പഠനം… അതുകഴിഞ്ഞേ സാധാരണ റോഡിലേക്ക്‌ ഇറക്കൂ.. എന്ന് ഉസ്താദ് മുനീര്‍ പറഞ്ഞപ്പോഴേ പകുതി ത്രില്‍ പോയി…

വണ്ടി ഓടിക്കാന്‍ അറിയാവുന്ന ഞാന്‍ സ്ടിയരിംഗ് പിടിക്കുന്നത് പോലും തെറ്റാണെന്നും … പിന്നെ കാറിന്‍റെ ഉള്ളിലും രണ്ടു സൈഡിലും ഉള്ള കണ്ണാടി വണ്ടി ഓടിക്കുമ്പോള്‍ നോക്കനുള്ളതാനെന്നും … അങ്ങനെ അങ്ങനെ പുതിയ അറിവുകളുടെയും തെറ്റുകളുടെയും നീണ്ട നിര കൂടി കേട്ടപ്പോള്‍ ഉള്ള ത്രില്ലും പോയി… ഒന്നിടവിട്ടുള്ള ദിവസങ്ങളില്‍ ഡ്രൈവിംഗ് ക്ലാസുകള്‍… ഓരോ ദിവസവും ഓരോ തരത്തിലുള്ള പാര്‍കിംഗ് പഠനം… ഉസ്താദ് പറഞ്ഞിരിക്കുന്ന കര്‍വ് സ്റ്റോണ്‍ -ല്‍ നോക്കാതെ ചെയ്താല്‍ കൃത്യമായി വണ്ടി പാര്‍ക്ക്‌ ചെയ്യും.. നോക്കി പോയാലും വണ്ടി പാര്‍ക്ക്‌ ചെയ്യും പാര്‍ക്കിംഗ് ലൈന്‍ ന്റെ മുകളില്‍ ആണെന്നുമാത്രം. തെറ്റുകൂടാതെ പാര്‍ക്ക്‌ ചെയ്യാന്‍ അധിക ദിവസങ്ങള്‍ ഒന്നും വേണ്ടി വന്നില്ല…എങ്ങിലും ഉസ്താദ് എന്നും എടുത്ത ക്ലാസുകള്‍ തന്നെ ആവര്തിപ്പിക്കുന്നു ..

വണ്ടി ഓടിക്കുന്നത് ഇഷ്ടം അല്ലാഞ്ഞിട്ടല്ല.. ഓരോ ക്ലാസ്സിനും 60 Dhs ഉം പിന്നെ പോക്ക് വരവ് കൂടി ആകുമ്പോള്‍ 100 Dhs ഇത് എനിക്ക്‌ അത്ര ഇഷ്ടമുള്ള പരുപാടിയല്ല … ഞാന്‍ പാര്‍ക്കിംഗ്‌ ടെസ്റ്റ്‌ നെ കുറിച്ച് തിരക്കിയപ്പോള്‍, ഉസ്താദ് ആണ് നമ്മള്‍ ടെസ്ടിനു യോഗ്യരെന്നു കണ്ടാല്‍ പേര് എഴുതി ഇടുന്നതെന്നും പിന്നെ ഓര്‍ഡര്‍ അനുസരിച്ച് ടെസ്റ്റ്‌ നു വിളിക്കുന്നതും.. അന്ന് ക്ലാസ്സിനു ചെന്നപ്പോള്‍ ഞാന്‍ മുനീരിനോട് തിരക്കി റെസ്ടിനു പേര് എഴുതി ഇടാനുള്ളതൊക്കെ ആയില്ലേ എന്ന്… രണ്ടു ദിവസം കൂടി കഴിയട്ടെ എന്ന് ഉസ്താതും…

ഓ.. രാഹുകാലം നോക്കി ഇടാനായിരിക്കും എന്ന് കരുതി….

പിറ്റേദിവസം രാവിലെ ഓഫീസില്‍ ഇരിക്കുമ്പോള്‍ ഉസ്താദിന്റെ ഫോണ്‍ വന്നു.. ലെജി എനിക്ക്‌ ഒരു 3000 Dhs വേണം … എന്റെ ക്രെഡിറ്റ് കാര്‍ഡിന്റെ പെയ്മെന്റ്റ്‌ ദിവസം ആണ് നാളെ , ഞാന്‍ നാട്ടില്‍ പോകാനുള്ള ഒരുക്കത്തില്‍ ആയതിനാല്‍ അല്പം ഞെരുക്കത്തില്‍ ആണ്.. ഒന്ന് സഹായിക്കണം എന്ന്….

അപ്പോഴാണ്‌ എനിക്ക്‌ കാര്യങ്ങള്‍ മനസ്സിലാത്‌ എന്നെ ടെസ്റ്റ്‌ നു വിളിക്കാത്തത് രാഹുവും ഗുളികനും ഒന്നും അല്ലാ പ്രശ്നം ഈ ക്രെഡിറ്റ്‌ കാര്‍ഡ്‌ ആണെന്ന്….

എന്താണെങ്കിലും ഞാന്‍ കൊടുത്തിട്ട് ഉസ്താദിന്റെ ക്രെഡിറ്റ്‌ കാര്‍ഡ്‌ പേ ചെയ്യില്ലെന്ന് ഉറപ്പിച്ചു.. അപ്പോള്‍ തന്നെ ഞാന്‍ പറഞ്ഞു .. എന്റെ കയ്യില്‍ ഉണ്ടാകുമെന്ന് തോന്നുന്നില്ല .. സാരമില്ല, ലെജി ഒന്ന് ശ്രമിക്ക് മുഴുവന്‍ ഇല്ലെങ്കിലും ഉള്ളത വൈകിട്ട വരുമ്പോള്‍ കൊണ്ടുവരാന്‍ എന്ന്….

മുനീര്‍ എന്റെ അളിയന്‍ അല്ലെ … ഞാന്‍ കാശുകൊടുക്കാന്‍……. … അല്ലാപിന്നെ…

പതിവ് പോലെ വൈകിട്ട് ക്ലാസ്സിനു ചെന്നു ..വണ്ടി കൃത്യമായി പാര്‍ക്ക്‌ ചെയ്താലും ശരിയല്ല എന്ന് ഉസ്താദ്‌…….;

ഞാന്‍ പാര്‍ക്ക്‌ ചെയ്യുന്നത് ശരി ആകണമെങ്കില്‍ ക്രെഡിറ്റ്‌ കാര്‍ഡ്‌ ക്ലീന്‍ ആകണമല്ലോ..

ഒന്ന് രണ്ടു ദിവസം കൂടി കഴിഞ്ഞാല്‍ മുനീര്‍ ലീവിന് നാട്ടില്‍ പോകും ..പുതിയ ആള്‍ വരും അയാള്‍ ടെസ്റ്റ്‌ നു പേര് കൊടുത്തോളും എന്ന് കരുതി ഞാന്‍ കാര്യമാക്കിയില്ല…

മുനീര്‍ പോയി ..ഒരു പാക്കിസ്ഥാന്‍കാരന്‍ ഹുസൈന്‍ ആണ് പുതിയ ഇന്‍സ്ട്രക്ടര്‍ … അയാള്‍ എന്നോട് മുനീര്‍ പഠിപ്പിച്ചിട്ടുണ്ടല്ലോ നീ ഓടിച്ചോളൂ എന്ന് പറയും..

ഓടിക്കാന്‍ അറിയാന്‍ പാടില്ലാത്ത കൊണ്ടല്ലല്ലോ ഞാന്‍ ക്ലാസിനു വന്നിരിക്കുന്നെ ? ഞാന്‍ വണ്ടി ഓടിച്ചുകൊണ്ടേ ഇരുന്നു .. ദിവസങ്ങളും … ഇവര്‍ ഒറ്റക്കെട്ടാണെന്നും മുനീര്‍ ചോദിച്ച പൈസ ഞാന്‍ കൊടുത്തില്ല എന്നുള്ളത് ഇയാളോട് പറഞ്ഞിട്ടുണ്ട് എന്നുള്ളതും അയാളുടെ പെരുമാറ്റത്തില്‍ നിന്ന് തന്നെ വ്യക്തം.. പിടിച്ചതിനെക്കാള്‍ വലുതാണ്‌ അണയില്‍ ഉള്ളത് എന്നുപരഞ്ഞപോലെ ആയി എന്റെ അവസ്ഥ..

20 ക്ലാസ്സില്‍ എല്ലാം തീര്‍ത്തു പോകാനിരുന്ന ഞാന്‍ 22 ക്ലാസ്സുകള്‍ കഴിഞ്ഞു.. ഇതുവരെ പാര്‍ക്കിംഗ് ടെസ്റ്റ്‌ നുള്ള ഡേറ്റ് കിട്ടിയിട്ടില്ല..ഇന്ന് എന്താണെങ്കിലും ചോദിച്ചിട്ടുതന്നെ ..
ക്ലാസ് തുടങ്ങി..തെറ്റ് കൂടാതെ പാര്‍ക്ക്‌ ചെയ്തിരുന്ന ഞാന്‍ ഒരു തവണ തെറ്റായി പാര്‍ക്ക്‌ ചെയ്തു.. ഞാന്‍ എവിടെ ആണ് തെറ്റിയതെന്നു ആലോചിക്കുന്നതിനു മുന്നേ ഹുസ്സൈന്‍ , ഇങ്ങനെ ആണോ പാര്‍ക്ക്‌ ചെയ്യുന്നത് .. ഇങ്ങനെ ആണെങ്കില്‍ എങ്ങനെ ഞാന്‍ ടെസ്റ്റ്‌ നു പേര് കൊടുക്കും എന്ന്..

ഇത്രയും നാള്‍ പിടിച്ചിരുന്ന എന്‍റെ മുഴുവന്‍ കണ്ട്രോളും പോയി..

ഞാന്‍ ചോദിച്ചു ഇത്രയും ദിവസം ഞാന്‍ കൃത്യമായി പാര്‍ക്ക്‌ ചെയ്തതൊന്നും നിങ്ങള്‍ കണ്ടില്ലല്ലോ ? ഞാന്‍ ഒരെണ്ണം തെറ്റിച്ചത് കൃത്യമായി കണ്ടല്ലോ …

പിന്നെ മറുപടി ഒന്നും ഉണ്ടായില്ല… അന്ന് കൂടുതല്‍ സംസാരങ്ങള്‍ ഒന്നും ഇല്ലാതെ ക്ലാസ്സ്‌ അവസാനിച്ചു..

ഞാന്‍ നേരെ ഓഫീസില്‍ പോയി ഇന്‍സ്ട്രക്ടര്‍ നെ മാറ്റുവാനുള്ള അപേക്ഷ കൊടുത്തു.. വൈകുന്നേരങ്ങളില്‍ ഒഴിവില്ല അതുകൊണ്ട് രാവിലെ ബാച്ചില്‍ ആണെങ്ങില്‍ അടുത്ത ആഴ്ച മുതല്‍ തുടര്‍ന്നോളൂ എന്ന്…

നനഞ്ഞിറങ്ങി പോയില്ലേ… കുളിച്ചു കയറുക തന്നെ…

രാവിലെ എങ്കില്‍ രാവിലെ… 8 നു ഓഫീസില്‍ പോകേണ്ട ഞാന്‍ 7.20 നു തന്നെ എഴുന്നേല്‍ക്കുന്നത് നൂറു പ്രാക്ക് മുതലാളിയെ പ്രാകിക്കൊണ്ടാ… ആ ഞാന്‍ നാളെ മുതല്‍ 5.50 നു ഉണരണം 6.20 നു ആണ് പുതിയ ഡ്രൈവിംഗ് പഠനം…

അങ്ങനെ എന്റെ മൂനാമത്തെ ഇന്‍സ്ട്രക്ടര്‍ ..ഒരു പാക്കിസ്ഥാനി തന്നെ… റഫീക്ക്‌……..

ആളു തൊഴിലിനോട് അല്പം ആത്മാര്‍ഥത ഉള്ള ആളാണെന്ന് തോന്നി… ആദ്യ ദിവസം തന്നെ പല ചെറിയ ചെറിയ കുഴപ്പങ്ങള്‍ കണ്ടെത്തുകയും അത് തിരുത്താനുള്ള കാര്യങ്ങള്‍ പറഞ്ഞു തരുകയും ചെയ്തു…

പിറ്റേന്ന് തന്നെ ഉസ്താദ്‌ ടെസ്റ്റ്‌ നു രജിസ്ടര്‍ ചെയ്തു … അങ്ങനെ ആദ്യ പാര്‍കിംഗ് ടെസ്റ്റ്‌…. …

ടെസ്റ്റ് നുള്ള ഊഴവും കാത്തിരിക്കുന്നു… തെറ്റുകൂടാതെ പാര്‍കിംഗ് ചെയ്യാറുള്ളതിനാല്‍ അത്ര ഭയം ഉണ്ടായില്ല..


ആദ്യ തവണ തന്നെ പ്രൈവറ്റ് സ്ക്കൂളില്‍ പഠിക്കുന്ന ബീന്‍സ്‌ നു കിട്ടിയ കൊണ്ട് ഇത് തോറ്റു ചെന്നാല്‍ ഓഫീസില്‍ ഉള്ളവരുടെ കളിയാക്കലുകളെ അല്പം പേടിയില്ലാതില്ല… എന്റെ തൊട്ടരികില്‍ ഒരു രാജേഷ്‌ … 3 തവണ പരാജയം സമ്മതിച്ച് അടുത്തതിനായി കാത്തിരിക്കുന്നു…അങ്ങനെ എന്റെ പേര് വിളിച്ചു.. ടെസ്റ്റി നുള്ള നാല് പേരും ടെസ്റ്റ്‌ നടത്തുന്ന ഒരു പോലീസുകാരനും ആണ് കാറില്‍ …
ആദ്യ ഊഴം എന്റേതാണ് .. ഞാന്‍ വണ്ടി ഓടിച്ച് പാര്‍ക്കിംഗ് ഏരിയ യിലേക്ക് .. അറബിയില്‍ അല്ലാതെ പോലീസ് ഒരു വാക്ക്‌ പറയുന്നില്ല.. അദേഹത്തിന്റെ ആക്ഷനില്‍ നിന്നാണ് ഞാന്‍ ഇടതും വലതും മനസ്സിലാക്കുന്നത്…. എന്നോട് ഇടതു വശത്തുള്ള 90 ഡിഗ്രി പാര്‍ക്കിംഗ്ചെയ്യാന്‍ പറഞ്ഞു.. ഞാന്‍ വളരെ കൂള്‍ ആയി പാര്‍ക്ക്‌ ചെയ്തു.. ഡോര്‍ തുറന്നു പാര്‍ക്കിംഗ് ശരിയാണോ എന്ന് നോക്കാന്‍ പറഞ്ഞു… വളരെ ശരിയാണ് …പാര്‍ക്കിംഗ് ലൈനിന്റെ കൃത്യം മുകളില്‍… സന്തോഷം..ഇത്രയും നാള്‍ പാര്‍ക്ക്‌ ചെയ്തിട്ട് ആ പാര്‍ക്കിംഗ് എനിക്ക് തെറ്റിയിരുന്നില്ല … ആദ്യ ടെസ്റ്റ്‌ സമ്പൂര്‍ണ്ണ പരാജയം…

പിറ്റേദിവസം ഉസ്താദ് പലതവണ ആ പാര്‍ക്കിംഗ് ചെയ്യിപ്പിച്ചപ്പോള്‍ ഒന്നും തെറ്റിയില്ല … ഉം എന്തുചെയ്യാന്‍ ഇനി ഒരാഴ്ചക്ക് ശേഷമേ അടുത്ത ടെസ്റ്റ്‌ കിട്ടൂ .. കാത്തിരിക്കാം ..

അങ്ങനെ വീണ്ടും ടെസ്റ്റ്‌ ദിവസം വന്നു .. കഴിഞ്ഞ തവനതെതിനെക്കാള്‍ അല്പം ടെന്‍ഷന്‍ കൂടുതല്‍ ആണ് … ടെസ്റ്റ്‌ തോല്‍ക്കുന്നതില്‍ അല്ല തോല്‍വിയും ആയി ഓഫീസില്‍ ചെല്ലുമ്പോള്‍ കുറെ ചെന്നായകള്‍ ഉണ്ട് ..അവരെ ആണ് പേടിക്കുന്നത് .. ഇത്തവണ എന്റെ ഊഴം നാലുപേരില്‍ അവസാനം ആയിരുന്നു … രണ്ട്‌ പാര്‍ക്കിംഗ് ,വിജയകരമായി പൂര്‍ത്തിയാക്കി .. സമാധാനമായി ..ആ ആവേശത്തില്‍ തിരിച്ച വരുന്നു … സാധാരണ വരാറുള്ള വഴിയില്‍ നിന്ന് വ്യത്യസ്തമായി പെട്ടെന്ന് മറ്റൊരു വഴിയിലൂടെ പോകാന്‍ പറഞ്ഞു … ആ വഴിയില്‍ ആദ്യം തന്നെ ഒരു റൌണ്ട് എബൌട്ട്‌ ആണ് … ഞാന്‍ അതും കഴിഞ്ഞു വണ്ടി പാര്‍ക്ക്‌ ചെയ്ത് ടെസ്റ്റ്‌ റിസള്‍ട്ട്‌ വാങ്ങാനായി കാത്തിരുന്നു ..എന്നെ ഞെട്ടിച്ചുകൊണ്ട് പരീക്ഷണത്തില്‍ വീണ്ടും തോല്‍വി എന്നെഴുതിയ കുറിപ്പ്‌ ..കാരണം round about ലേക്ക് എന്റര്‍ ചെയ്തത് ശരിയായില്ല പോലും ….

ചെന്നായ്ക്കള്‍ക്ക് ഇന്നും ആട്ടിന്‍കുട്ടിയെ കിട്ടി ….

ക്ലാസുകള്‍ തുടര്‍ന്നുകൊണ്ടേ ഇരുന്നു …അങ്ങനെ 20 ക്ലാസ്സില്‍ ലൈസന്‍സ് ഉം ആയി പോകാനിരുന്ന ഞാന്‍ 32 മാതെ ക്ലാസ്സില്‍ ആണ് പാര്‍ക്കിംഗ് പാസ്‌ ആയത് .. മൂനാമത്തെ പരീക്ഷണത്തില്‍ …
നാളെ മുതല്‍ ഷാര്‍ജ തെരുവീധികളിലൂടെ വണ്ടി ഓടിക്കാം … പാര്‍ക്കിംഗ് ടെസ്റ്റ്‌ നു ശേഷം 20 ക്ലാസ്സ്‌ എങ്കിലും കുറഞ്ഞത് കഴിയണം അടുത്ത കടമ്പ ആയ പ്രീ- റോഡ്‌ ടെസ്റ്റ്‌ നു ..

വണ്ടി ഓടിക്കുമ്പോള്‍ ഉസ്താത് എന്തെങ്ങിലും ഒക്കെ ചോദിച്ചുകൊണ്ടിരിക്കും ..ഞാന്‍ നമ്മുടെ നാടും … റോഡും … M.G റോഡും അവിടത്തെ ട്രാഫിക്‌ ഉം … എല്ലാം വര്‍ണ്ണിക്കും . ..

വണ്ടി ഓടിക്കുമ്പോള്‍ ഞാന്‍ മിറര്‍ നോക്കുന്നില്ല എന്നതാണ് ഉസ്താതിന്റെ പ്രധാന പരാതി … നാട്ടില്‍ മിറര്‍ ഇല്ലെങ്ങില്‍ എന്ത് ഉണ്ടെങ്കില്‍ എന്ത് ..ആ ശീലം ആണ് എന്നെ കുഴപ്പിക്കുന്നത് …

അങ്ങനെ 55 മത്തെ ദിവസം ആദ്യ പ്രി ടെസ്റ്റ്‌ കിട്ടി… ഇത്തവണയും ആദ്യ ഊഴം എന്റേത തന്നെ.. 3 തവണ പോലീസ് അടുത്തിരുന്നു പാര്‍ക്കിംഗ് ടെസ്റ്റ്‌ നടത്തിയതിനാല്‍ അങ്ങനെ ഒരാള്‍ അടുതിരിക്കുന്നെന്ന പേടി ഒന്നും ഇല്ലാതെ ആണ് ഞാന്‍ വണ്ടി ഇന്‍സ്റ്റിറ്റ്യൂട്ടില്‍ നിന്ന് പുറത്തേക്ക് ഓടിച്ചത്..പ്രധാന റോഡിലേക്ക് ഇറങ്ങുന്ന വഴിയില്‍ പതിവില്ലാത്ത ട്രാഫിക്‌.. ..വണ്ടികള്‍ ഒന്നിന് പുറകെ ഒന്നായി കിടക്കുന്നു.. ഞാനും ആ നിരയിലേക്ക് ചേര്‍ന്നു.. വണ്ടികള്‍ സാവധാനം നീങ്ങുന്നു.. ഞാനും അതിനു തൊട്ടുപുറകെ ഉണ്ട്.. എനിക്ക് M.G റോഡിലൂടെ ഉള്ള യാത്രയാണ് ഓര്‍മ്മവന്നത്…ഈ ഓര്‍മ്മകള്‍ക്ക് വിരാമം ഇട്ടുകൊണ്ട് അറബി പോലീസ് എന്തോ പറഞ്ഞു… എനിക്കൊന്നും മനസ്സിലായില്ല… ഞാന്‍ മുന്‍പിലുള്ള വണ്ടി നീങ്ങുന്നതിന് അനുസരിച്ച് മുന്‍പോട്ട് പോയിക്കൊണ്ടേ ഇരുന്നു.. ഒരു കണക്കിന് പ്രധാന റോഡില്‍ എത്തി… അവിടെന്ന് കുറച്ചു ദൂരം മാറി ഒരു പാര്‍ക്കിംഗ് ഏരിയ യില്‍ വണ്ടി പാര്‍ക്ക്‌ ചെയ്യാന്‍ പറഞ്ഞു… ഓ ..ഇത്ര പെട്ടെന്ന് തീര്‍ന്നല്ലോ എന്നു കരുതി പുറത്തിറങ്ങി.. ഇറങ്ങിയ വഴി തന്നെ അറബി .. ഒരു പേപ്പറില്‍ തോറ്റു എന്നും..

വണ്ടികള്‍ തമ്മില്‍ അകലം പാലിച്ചില്ല എന്ന കാരണവും….

വളരെ നിരാശ തോന്നി…

നിയമങ്ങള്‍ കര്‍ശനമായി പാലിക്കപ്പെടെണ്ടത് തന്നെയാണ്.. എങ്ങിലും ഒരു പ്രി ടെസ്ടിനു, പറഞ്ഞു തന്നാല്‍ തിരുത്താവുന്ന ഒരു തെറ്റിനു ഇത്രയും കര്‍ക്കശം വേണ്ടിയിരുന്നോ എന്നൊരു തോന്നല്‍..

ടെസ്റ്റ്‌ കഴിഞ്ഞു നേരെ ഓഫീസിലേക്ക്‌ ആണ് പോയത്‌.. .. ഒരു പാക്കിസ്ഥാന്‍ കാരന്‍ ആണ് ടാക്സി ഡ്രൈവര്‍.. എന്റെ നിരാശ അദ്ദേഹം മുഖത്തുനിന്ന് വായിച്ചെടുത്ത മട്ടില്‍ എന്നോട് ചോദിച്ചു.. ടെസ്റ്റ്‌ ആയിരുന്നല്ലേ, പരാജയം കാര്യമാക്കണ്ട ഒരു ലക്ഷ്യത്തിനായി ശ്രമിക്കുന്നവര്‍ക്കെ പരാജയം ഉണ്ടാകൂ… നിങ്ങള്‍ ഒരു ലക്ഷ്യത്തിനു അരികില്‍ ആണ്… ഈ ഓര്‍മ്മപ്പെടുത്തല്‍ എന്നെ നിരാശയില്‍ നിന്ന് അല്പം കരകയറ്റി….

അടുത്ത മാസം ചേട്ടായിയുടെ കല്യാണം ആണ് ..ഞാന്‍ നാട്ടില്‍ പോകും .. അതിനുമുന്നേ ഈ പരീക്ഷണങ്ങള്‍ അവസാനിപ്പിക്കണം എന്ന ഉദ്ദേശത്തിലാണ് …

ഞാന്‍ നാട്ടില്‍ പോകുന്നെന്നു പറഞ്ഞ അന്ന് മുതല്‍ ഇടയ്ക്കിടെ ഉസ്താത് അദ്ധേഹത്തിന്റെ മൊബൈല്‍ ഫോണ്‍ ശരി അല്ല എന്നും.. അത്യാവശ്യത്തിനു വിളിച്ചാല്‍ കിട്ടില്ല എന്ന് പറയാറുണ്ട്…

എന്നെ ബാധിക്കുന്ന ഒരായിരം കാര്യങ്ങള്‍ വേറെ ഉള്ളപ്പോള്‍ ഞാന്‍ അത് കേട്ട ഭാവം നടിച്ചില്ല…

പിന്നീട് ഇടയ്ക്കിടെ Nokia E5 എങ്ങനെയുണ്ട് നല്ല ഫോണ്‍ ആണോ എന്നൊക്കെ ചോദിക്കുന്നു.. അപ്പോഴേ എനിക്ക് രോഗം മനസ്സിലായി.. ഈ ഉസ്താദും മോശക്കാരന്‍ അല്ലെന്നു…

ഞാന്‍ ഫോണ്‍ വാങ്ങിക്കൊടുത്ത് എനിക്ക് ടെസ്റ്റ്‌ പാസ്സ് ആകേണ്ട.. ഇത്രയൊക്കെ ആയില്ലേ …എത്രത്തോളം പോകും എന്ന് കണ്ടറിയാം എന്നുതന്നെ തീരുമാനിച്ചു…. ഫോണിനെ കുറിച്ച് പറയുമ്പോള്‍ ഞാനും …അത് നല്ലതാണ് ..അതിനേക്കാള്‍ നല്ലത് ഇതാണ് എന്നൊക്കെ പറഞ്ഞു വിടും.. ഞാന്‍ ആരാ മോന്‍…..

വീണ്ടും ടെസ്റ്റ്‌ ദിവസം സമാഗതമായിരിക്കുന്നു …

ഇത്തവണ എനിക്ക് ഒരു മുന്‍വിധികളും ഉണ്ടായില്ല.. പറഞ്ഞ വഴിയൊക്കെ ഓടിച്ചു.. ഒന്ന് രണ്ടിടത്ത് പാര്‍ക്ക്‌ ചെയ്യാന്‍ പറഞ്ഞു അതും ചെയ്തു.. അവര്‍ കുറ്റം കണ്ടു പിടിക്കാത്തത്‌ കൊണ്ടോ അതോ അറബിയിന്നു രാവിലെ പോന്നപ്പോള്‍ ഭാര്യയും ആയി പിണങ്ങാത്തകൊണ്ടോ എന്നറിയില്ല ഞാന്‍ പാസ്സ് ആയി…

ഇനി ഒരു കടമ്പ കൂടി … ഫൈനല്‍ റോഡ്‌ ടെസ്റ്റ്‌…

10 ദിവസം കഴിയണം ഇനി ടെസ്റ്റ്‌ കിട്ടാന്‍.. പക്ഷെ അപ്പോഴേക്കും എനിക്ക് നാട്ടില്‍ പോകേണ്ട ദിവസവും ആകും… അടുത്ത ടെസ്റ്റ്‌ പാസ്സ് ആകാന്‍ നാന്നായി ശ്രമിച്ചോളൂ.. അല്ലെങ്ങില്‍ വീണ്ടും പ്രി ടെസ്റ്റ്‌ അറ്റന്റ്‌ ചെയ്യേണ്ടി വരും എന്ന് ഉസ്താത് ഓര്‍മപ്പെടുത്തി…

കൂടുതല്‍ തിരക്കിയപ്പോള്‍ ആണ് ഞാന്‍ അറിയുന്നത് 30 ദിവസത്തില്‍ കൂടുതല്‍ ക്ലാസ്സ്‌ സ്റ്റോപ്പ്‌ ചെയ്താല്‍ ഫൈനല്‍ ടെസ്ടിലുള്ളവര്‍ വീണ്ടും പ്രി ടെസ്റ്റ്‌ അത്റെന്റ്റ്‌ ചെയ്യണം എന്നാണു പോലും…

ഇവിടെ വരെ എങ്ങനെയാണ് എത്തിയതെന്ന് എനിക്കും ദൈവത്തിനും മാത്രേ അറിയൂ..

പാസ്സ് ആയെ മതിയാകൂ എന്നുള്ളകൊണ്ട് ഞാന്‍ കരുതലോടെ ആണ് വണ്ടി ഓടിച്ചത്… വല്യ കുഴപ്പങ്ങള്‍ ഇല്ലാതെ കുറെ ഓടിച്ചു.. പാസ്സ് ആകുമെന്ന് കരുതി തന്നെയാണ് ഞാന്‍ കാര്‍ ഓടിച്ചുകൊണ്ടിരിക്കുന്നത് .. അപ്പോഴാണ്‌ എന്റെ പുറകില്‍ വന്നു ഏതോ കാലമാടന്‍ ഹോണ്‍ മുഴക്കിയത്‌.. അവന്റെ ആര്‍ക്കോ വായുഗുളിക വാങ്ങിക്കാന്‍ പോകണം പോലും… പോകുന്നതില്‍ എനിക്ക് ഒരു വിരോധവും ഇല്ലാ…അവനു പോകാന്‍ ഞാന്‍ പോകുന്നതിന്റെ ഇടത് വശത്ത് ഫാസ്റ്റ് ട്രാക്കും വലത് വശത്ത് സ്ലോ ട്രാക്കും ഉണ്ടായിരുന്നു.. അതുവഴി അവനു പോയിക്കൂടായിരുന്നോ.. എന്നെ മനപൂര്‍വം തോല്‍പ്പിക്കനായി തന്നെ ആരോ അയച്ചപോലെ എന്റെ പുറകില്‍ വന്നു ഹോണ്‍ അടിച്ചത്…എന്ത് പറയാന്‍ ഞാന്‍ തോറ്റു..

നാളെ നാട്ടില്‍ പോവുകയാണ്.. ഒരു മാസം കഴിഞ്ഞേ തിരിച്ച് വരൂ.. ഞാന്‍ ക്ലാസ്സുകള്‍ നിര്‍ത്തി വെക്കുവാനുള്ള അപേക്ഷയും കൊടുത്ത് ഞാന്‍ നാട്ടിലേക്ക്‌ പോയി…

ചേട്ടായിയുടെ കല്യാണം ഭംഗിയായി നടന്ന് തിരിച്ചെത്തി…

ഇതിനിടയില്‍ പ്രൈവറ്റ് സ്കൂളില്‍ ചേര്‍ന്ന ബിന്‍സിന് ലൈസന്‍സ് ഉം കിട്ടി.. U.A.E തെരുവുകളിലൂടെ വണ്ടി ഓടിച്ചുതുടങ്ങി… ഞാന്‍ ഫൈനല്‍ ടെസ്റ്റില്‍ എത്തിയിട്ടും വീണ്ടും പ്രി ടെസ്റ്റ്‌ നു കാത്തിരിക്കുന്നു .. ഇനി എത്രനാള്‍ കാത്തിരിക്കേണ്ടിവരും ഈ ഡ്രൈവിംഗ് ലൈസെന്‍സ് ഒന്ന് കയ്യില്‍ കിട്ടാന്‍……

എന്താണെങ്കിലും ഞാന്‍ ക്ലാസ്സുകള്‍ പുനരാരംഭിക്കാന്‍ കത്തുനല്‍കി…ഒരാഴ്ചക്കുള്ളില്‍ അവര്‍ വിളിച്ചു …പഴയ ഉസ്താതും പഴയ സമയവും തന്നെ…രാവിലെ ഉണര്‍ന്നു ക്ലാസിനു പോകും… ഇതിപ്പോള്‍ ദിനചര്യയുടെ ഭാഗമായിരിക്കുന്നു…

ഒരാഴ്ച കഴിഞ്ഞു പ്രി ടെസ്റ്റി നുള്ള ദിവസം ആയി… പ്രതീക്ഷകള്‍ ഒന്നും ഇല്ലാതെയാണ് പോയത്‌……; ഒരു ചെറിയ പിഴവ് മതി ടെസ്റ്റ്‌ അവര്‍ക്ക്‌ തോല്‍പ്പിക്കാന്‍ … പിന്നെ രണ്ടാമതും ഈ ടെസ്റ്റ്‌ അറ്റന്‍ഡ് ചെയ്യേണ്ടി വരുന്നതില്‍ ഉള്ള നീരസവും…

വളരെ പ്രതീക്ഷകളോടെ മുന്നേറുമ്പോള്‍ ആണല്ലോ പിഴവുകളും കണക്കുകൂട്ടലുകളും ലക്ഷ്യത്തിനു മുകളില്‍ കരിനിഴല്‍ വീഴ്ത്തുന്നത്… എന്തുകൊണ്ടോ ഞാന്‍ ഈ ശ്രമത്തില്‍ തന്നെ പാസ്സ് ആയി…

അങ്ങനെ ഫൈനല്‍ ടെസ്റ്റില്‍ അല്ല വീണ്ടും ഫൈനല്‍ റെസ്ടിനു യോഗ്യനായി…

ആദ്യ ഫൈനല്‍ ടെസ്റ്റ്‌ ദിവസം.. ടെസ്റ്റ്‌ അറ്റന്‍ഡ് ചെയ്തതിനു ശേഷം ഓഫീസിലേക്ക് പോകാംഎന്നുകരുതി.. ഫൈനല്‍ ഡ്രൈവിംഗ് ടെസ്റ്റ്‌ ഇന്നാണ് ഞാന്‍ ഓഫീസില്‍ എത്താന്‍ അല്പം വൈകും എന്ന് വിളിച് മുതലാളിയെ അറിയിച്ചപ്പോള്‍ 10 മണിക്ക ഒരു അത്യാവശ്യ മീറ്റിംഗ് വെച്ചിട്ടുണ്ട് ഒരു കാരണവശാലും വൈകരുതെന്ന്…

പിന്നെ ഞാന്‍ ഇല്ലേ പ്രൊജക്റ്റ്‌ നടക്കില്ലല്ലോ …

10 എന്നുള്ളത് ഒരു 11 ആക്കിയാല്‍ എനിക്ക് ടെസ്റ്റ്‌ അറ്റന്‍ഡ് ചെയ്യാമായിരുന്നു എന്നൊക്കെ പരമാവതി പറഞ്ഞു നോക്കിയിട്ടും അമ്പിനും വില്ലിനും അടുക്കാതെ എനിക്ക് ടെസ്റ്റ്‌ അറ്റന്‍ഡ് ചെയ്യാനാവാതെ ഓഫീസിലേക്ക് തിരിക്കെണ്ടിവന്നു….
ഇതും എനിക്കൊരു അനുഭവം..
പത്തു ദിവസങ്ങള്‍ക്ക് ശേഷം വീണ്ടും ഫൈനല്‍ ടെസ്ടിനുള്ള മെസ്സേജ് കിട്ടി..ഈ തവണ മുതലാളി തിരിച്ചു വിളിക്കാതിരിക്കാന്‍ ഞാന്‍ മുന്‍പേ തന്നെ പകുതി ദിവസം ലീവ് എടുത്തിട്ടാണ് ടെസ്ടിനു പോയത് .. നഷ്ടങ്ങള്‍ മാത്രമുള്ള ഈ ഡ്രൈവിംഗ് പഠനത്തില്‍ നാട്ടില്‍ നില്‍ക്കേണ്ട ഒരു അര ദിവസം കൂടി … ഈതവണ രണ്ടാം ഊഴമായിരുന്നു എന്റെത് …ഓടിച്ചു … തെറ്റുകുറ്റങ്ങള്‍ ഇല്ലാതെ…

അങ്ങനെ ആകെ 92 .ക്ലാസ്സുകള്‍ക്കും 9 ടെസ്റ്റ്‌ കള്‍ക്കും ശേഷം എനിക്ക് യു എ ഇ ഡ്രൈവിംഗ് ലൈസന്‍സ് കിട്ടി…

ചെലവായത് 11,200 Dhs അതായത് 168000 ഇന്ത്യന്‍ രൂപ…

അഭിമാനമുണ്ട് .. നീണ്ട പ്രയത്നത്തിലൂടെ കിട്ടിയ ലൈസെന്‍സ്സുമായി ഈ തെരുവുകളിലൂടെ വണ്ടി ഓടിക്കുന്നതില്‍……..

Thank you for reading malayalam blogs Kalappadan

നമുക്കും കിട്ടി സ്വാതന്ത്രം …

സ്വതന്ത്രമായി ജീവിക്കാന്‍..
സ്വതന്ത്രമായി നടക്കാന്‍ ..
സ്വതന്ത്രമായി അഭിപ്രായങ്ങള്‍ പറയാന്‍.. ……
അങ്ങനെ ഹനിക്കപ്പെട്ട പലതിന്മേലുമുള്ള സ്വതന്ത്രം …
പക്ഷെ പാരതന്ത്രത്തിന്റെ അനുഭവങ്ങളിലൂടെ കടന്നു വന്നവനെ ആ സ്വാതന്ത്ര്യത്തിന്റെ വില അറിയൂ …
ആല്ലാത്ത ഒരുവനും അത് മറ്റൊരു ആഘോഷത്തിന്റെ ദിവസം മാത്രം…
ഈ ആഘോഷങ്ങള്‍ സ്വാതന്ത്ര്യത്തിനായി ജീവിതവും ജീവനും ബലികഴിച്ച ഒരായിരം മനുഷ്യരെ തിമസ്കരിക്കുന്നു..

ഇത് വെറും ഒരു ആഘോഷത്തിന്റെ ദിനം ആകാതെ …
ആ ദിനത്തില്‍ മാത്രം ഭാരത സംസ്കാരത്തില്‍ ഊറ്റം കൊള്ളാതെ…
പണക്കാരന്‍ – പാവപ്പെട്ടവന്‍.. എന്ന വേര്‍തിരിവില്ലാതെ
ജാതി-മത- വര്‍ഗ്ഗ വേര്‍തിരിവില്ലാതെ ..
പാര്‍ട്ടികളുടെ വേര്‍തിരിവുകളില്ലാതെ ..
നമ്മള്‍ ഭാരതീയര്‍ എന്ന് എല്ലാ ദിനവും വിളിച്ചു പറയാന്‍ നമുക്ക് കഴിയട്ടെ …
എന്നെപ്പോലെ അവനും സ്വാതന്ത്രനാണ് എന്ന ഓര്‍മ്മപ്പെടുത്തലോടെ..
എല്ലാവര്ക്കും എന്റെ സ്വാതന്ത്ര ദിന ആശംസകള്‍..

Thank you for reading malayalam blogs Kalappadan

വെളുക്കാന്‍ തേച്ചത്

ഞാന്‍ ലെജി , വയസ്സ് 29 ഉം ഒരു വര്‍ഷത്തെ പ്രവര്‍ത്തി പരിചയവും… കല്യാണം കഴിച്ചിട്ടില്ല….. ഇത്‌ എന്ത് പറ്റി ഇവന് എന്ന് ആലോചിച്ച് തല പുകയണ്ട…

ഞാന്‍ പറയുന്ന അനുഭവവും എന്റെ പ്രായവും തമ്മില്‍ ചക്കരയും ഈച്ചയും പോലെ ഒരുബന്ധം ഉണ്ട്‌ …
അങ്ങനെ ചേട്ടായിയുടെ കല്യാണം വന്നെത്തി…..
എന്റെ Annual leave ഒരു മാസം നേരത്തേ ആക്കി ഞാനും നാട്ടിലേക്ക് പോകാനുള്ള ഒരുക്കത്തില്‍ ….
വളരെ ആകാംഷയോടെയാണ് നിശ്ചയവും കല്യാണ ദിവസവും സ്വപ്നം കണ്ടത്‌…
ആകെ ഉള്ള അനിയന്‍ അല്ലേ.. ശരിക്കും ആഘോഷിക്കണം ദിവസങ്ങള്‍….അത് തന്നെയും അല്ല…. അടുത്ത ഊഴം എന്റെ ആണല്ലോ…
വിവാഹ മാര്‍ക്കറ്റിലേക്ക് വലതുകാല്‍ എടുത്ത് വെക്കാനായി ഇരിക്കുന്ന ഒരു യുവാവ്…. എന്താ യുവാവ് എന്ന് പറഞ്ഞപ്പോ ഒരു ഓക്കാനം വരുന്നേ….
നാട്ടില്‍ കേന്ദ്രം ആ വിശേഷണത്തിനുള്ള പ്രായപരിധി പുതുക്കി എന്ന് കരുതി ഇവിടെ അറബികള്‍ ഇപ്പോഴും അളക്കുന്നത് പഴയ സ്കായിലില്‍ തന്നാണ്…
നിങ്ങള്‍ അതും ഇതും ചോദിച്ചു വിഷയത്തില്‍ നിന്ന് ശ്രദ്ധ തെറ്റിക്കാതെ…
അതെ… കല്യാണത്തിന് ചേട്ടന്‍ കഴിഞാന്ല്‍ അടുത്ത ശ്രദ്ധാകേന്ദ്രം അനിയന്‍ ആണല്ലോ…..
അത് തന്നെയും അല്ല പ്രശ്നം .. ചേട്ടായിയുടെ പെണ്ണുകാണല്‍ മുതല്‍.. ഈ അനിയന്റെ പേരും പ്രസിദ്ധമാണ് …
അനിയന്റെ ലീവ് നോക്കിയെ കല്യാണം വെക്കാന്‍ പറ്റൂ… ഡ്രസ്സ്‌ എടുക്കന്ന്ത്‌ അനിയന്‍ വന്നിട്ട് മതി …
അങ്ങനെ…. അങ്ങനെ …. നാട്ടില്‍ അനിയനെ ഒരു സംഭവം ആക്കി വെച്ചിരിക്കുക ആണല്ലോ…
.2 കിലോ എന്തെങ്കിലും പോക്കറ്റില്‍ ഇട്ടു ത്രാസ്സില്‍ നിന്നാലേ ഞാന്‍ 60 കിലോ തികയത്തുള്ളൂ….ആ … ഞാന്‍… എങ്ങനെ ഒരു സംഭവം ആക്കും എന്നതായിരുന്നു എന്റെ ചിന്തകള്‍….

പൊക്കം.. അതുപിന്നെ ശരാശരി ഇന്ത്യാക്കാരന്റെ ഉള്ളതിനാല്‍ അത് പേടിക്കണ്ട…
കുറച്ചു വണ്ണം കൂട്ടാം എന്ന് വിചാരിച്ചാല്‍.. പത്ത്‌ .. മുപ്പത്‌… അല്ല, കുറെ വര്‍ഷങ്ങള്‍ അയി പറ്റാത്തത്‌ എങ്ങനെ 2..3 ആഴ്ച കൊണ്ട പറ്റും… എങ്ങിലും ആത്മ സംതൃപ്തിക്ക് വേണ്ടി ഒരു ശ്രമം നടത്താമെന്നുവെച്ചാലും … കഴിഞ്ഞ ഒരു ആഴ്ചയായി മാറാത്ത പനി എന്നെക്കൊണ്ട് പോക്കറ്റില്‍ ഇനിയും ഭാരം ഇടീക്കും എന്നാണു തോന്നുന്നേ….
പനി ഒരു വിധം ശമിച്ചു…. ജലദോഷം മാറിയിട്ടില്ല…. പോകുന്നതിനു മുന്‍പേ മാറ്റിയെടുക്കാനായി.. ഒന്നുവീതം അഞ്ചും- ആറും നേരം മുടങ്ങാതെ ആവിപിടിക്കുന്നു….
രക്ഷയില്ല…ഒടുവില്‍ മരുന്ന് വാങ്ങി… മരുന്നും ഫലം ചെയ്യുന്നില്ല… ഒരു tissue box വേണം ഒരു ദിവസം….
അപ്പോഴാണ്‌ മനസിലേക്ക് ആ ചിന്ത കടന്നുവന്നത്…
പണ്ട് മുള്ളന്‍ പന്നിയുടെ മുടി പോലെ ഇരുന്ന എന്റെ മുടി… നല്ല നീളത്തില്‍ നിര്‍ത്തുന്നത്‌ കൊണ്ട് ഒരു വിധം ….ഒരു വിധം അല്ല… നന്നായി തന്നെ ഒതുങ്ങി നില്‍ക്കും..
ബാര്‍ബര്‍ ഷോപ്പില്‍ ചെല്ലുമ്പോള്‍ ഓരോരുത്തര്‍ മുടി straight ആക്കാന്‍ വരുന്നത് കാണുമ്പോള്‍ എനിക്ക് ചിരി വരും … straight ആയതിന്റെ വിഷമം ഞാന്‍ അനുഭവിക്കുന്നതോര്ത്…
പിന്നെ.. ആ മുടിയുടെ തൂക്കം നിങ്ങള്‍ മുന്നേ തൂക്കിയതില്‍ നിന്ന് കുറക്കാനോന്നും നിക്കണ്ട….
ഈ മുടി ഇങ്ങനെ നില്‍ക്കുന്നത്‌ കൊണ്ട് ആണോ ജലദോഷം മാറാത്തത് എന്നോര്‍ത്ത് അലപം നീളം കുറച്ച കളയാം എന്ന് തീരുമാനിച്ചു ….
ആസ്ഥാന ബാര്‍ബര്‍ …ഫൈസല്‍… നാട്ടിലായതിലാല്‍ .. കിട്ടുന്ന ആളെ കൊണ്ട് മുടി വെട്ടിക്കാം എന്ന് തീരുമാനിച്ചു… ഒരുത്തനെ കിട്ടി… അവനോടു അല്പം നീളം കുറച്ചേക്കാന്‍ പറഞ്ഞു… മുടി വെട്ടി ഇറങ്ങിയ എനിക്ക് തലക്കു മുകളില്‍ ഒരു ബ്രേഷ്‌ ഇരിക്കുന്ന പോലെ ആണ് തോന്നിയത്‌….
ഇതോടെ ‘സംഭവ’ ത്തിന്‍റെ കാര്യത്തില്‍ ഒരു തീരുമാനം ആയി ….
അങ്ങനെ നാട്ടില്‍ എത്തി… കല്യാണത്തിന്റെ തിരക്കുകള്‍….ഒടുവില്‍ കല്യാണ നിശ്ചയത്തിന്റെ തലേ ദിവസം …..
ചേട്ടായിയുടെ മുഖം Facial ചെയ്യാനായി ..വീടിനടുത്തുള്ള ഏലിയാസ് എത്തി… അവന്‍ ഏറണാകുളത്ത് ആണ് ജോലി ചെയ്യുന്നത്… സിനിമ-സീരിയല്‍ താരങ്ങള്‍ക്ക് ഒക്കെ ആണ് ഇപ്പൊ Facial ചെയ്തു കൊടുക്കുന്നത് എന്നൊക്കെ ആണ് … അവന്‍ .. പറഞ്ഞത്…
ഇത് കേട്ടതും… എന്‍റെ മുടിയില്‍ പോയ കുറവ്‌ മുഖത്ത് ശരിയാക്കാം എന്ന് മനസ്സില്‍ ഒരു ലഡ്ഡു പൊട്ടി…..
എന്നാല്‍ ചേട്ടായിയുടെ കഴിയുമ്പോള്‍ നീ എന്‍റെ കൂടി ഒന്ന് ചെയ്തോളു…. എന്ന് ഞാനും പറഞ്ഞു….
അങ്ങനെ ചേട്ടായിയുടെ മുഖം കഴിഞ്ഞതും എന്നെ ദിവാന്‍ കോട്ടില്‍ നീളത്തില്‍ കിടത്തി… ഒരു ഒന്നൊന്നര മണിക്കൂര്‍……
ഇത്രയും പുട്ടിയിടാനും മാത്രം കുഴിയൊന്നും എന്‍റെ മുഖത്ത് ഇല്ലല്ലോ…അതുമല്ല നാട്ടില്‍ വന്ന ഉടനെ കണ്ടവര്‍ ഒക്കെ … ക്ഷീണിച്ചു പോയിട്ടോ … എങ്ങിലും വെളുത്തിട്ടുണ്ട് ….. എന്ന് പറഞ്ഞതൊക്കെ ഓര്‍മ്മ വന്നു….
ആ… ദിലീപിനും കുഞ്ചാക്കോബോബനും ഒക്കെ ഇടുന്നത് പോലെ ചെയ്യുന്ന കൊണ്ടാകും സമയം എടുക്കുന്നതോര്‍ത്ത്‌ ഞാന്‍ ഒരു ഉറക്കം ഉറങ്ങി……
കഴിഞ്ഞു ചേട്ടായി .. എഴുന്നെറ്റൊളൂ … എന്ന് ഏലിയാസ്‌ പറഞ്ഞപ്പോള്‍ ആണ് ഞാന്‍ ഉണര്‍ന്നത്‌…
മുഖം ഒക്കെ കഴുകി…. തരക്കേടില്ല… ഒരു മാറ്റം ഒക്കെ കാണാനുണ്ട്…..
ഇനി കുറച്ച ദിവസത്തേക്ക്‌ വെയില്‍ ഒന്നും കൊള്ളരുത് … ചൂടും അടിക്കെരുതെന്നും… അല്പം കൊള്ളേണ്ട സാഹചര്യം ഉണ്ടായാല്‍ ഈ സണ്‍ ക്രീം പുരട്ടി വേണം ഇറങ്ങാന്‍ എന്നും പറഞ്ഞാണ് ഏലിയാസ്‌ പോയത്‌……
അങ്ങനെ നിശ്ചയദിവസം ആകെ തിരക്കില്‍ ആയിരുന്നു….
വരുന്നരെ ഒക്കെ സ്വീകരിക്കണം… തിരക്കിനിടയില്‍ സണ്‍ ക്രീം തേക്കാനും മറന്നു.. ഒടുക്കത്തെ വെയിലും… …
പിന്നെ തൊടുപുഴ ക്ക് പോകാനായി വന്ന ബസ്സില്‍ നാട്ടുകാരോടും കൂട്ടുകാരോടും ഒപ്പം ഞാനും കയറി…. വഴിയില്‍ ഒന്ന് രണ്ട് പേരെ കൂടി കയറ്റിയത് കൊണ്ട് ഞങ്ങള്‍ വൈകിയാണ് തൊടുപുഴയില്‍ എത്തിയത് …
അതുമല്ല …function നടക്കുന്ന ഹോളിനു അടുത്ത് എത്തിയപ്പോള്‍ ബസ്സും ബ്രേക്ക് ഡൌണ്‍ ആയി… അപ്പോഴേക്കും വിളി വന്നു….നീ വേഗം വാ… നീ വന്നിട്ടേ ഇവിടെ ഹോളിലെക്ക് കയറുന്നുള്ളൂ എന്ന്…
ഈ സമയം കൊണ്ട് …തൊടുപുഴ ടൌണില്‍ തരക്കേടില്ലാത്ത ബ്ലോക്ക്‌ ഉണ്ടാക്കിയിട്ടുണ്ട് ഞങ്ങള്‍…
ഞാനും മനീഷും കൂടി ഹാളിലേക്ക്‌ നടന്നു.. നല്ല നട്ടക്കണ്ടം വെയില്‍ … ഒരു തുള്ളി പോലും വിടാതെ ഞാനും മനീഷും കൊണ്ടു… അവന്‍ Facial ചെയ്തിട്ടില്ലാത്തകൊണ്ട് അവനൊരു മാറ്റവും ഇല്ല…
എനിക്കോ….. വെളുക്കാന്‍ തേച്ചതല്ലേ… നല്ല സൂപ്പര്‍ പാണ്ടായി …. ആരും ഒന്ന് ശ്രദ്ധിക്കും…
അനിയനു ഗള്‍ഫില്‍ ടാറിന്റെ പണി ആണോ എന്ന് വരെ ചോദിപ്പിച്ചു ….. ഇതില്‍ കൂടുതല്‍ എന്ത് സംഭവം ആക്കാന്‍… കല്യാണം കഴിഞ്ഞു തിരച്ചു ദുഫായില്‍ എത്തിയിട്ടും ആ കരിവാളിപ്പ്‌ മാറിയിട്ടില്ല….


Thank you for reading malayalam blogs Kalappadan

ഒരു സൂര്യകാന്തി പൂവിന്റെ ഓര്‍മ്മയ്ക്ക്

പതിവുപോലെ അന്നും  അലാറം  കൃത്യസമയത്ത് തന്നെ വിളിച്ചുണര്‍ത്തി ..

A .C യുടെ തണുപ്പില്‍ പുതച്ച് മൂടി കുറച്ചുകൂടി കിടന്നുറങ്ങണമെന്നുണ്ട്..

പക്ഷെ ഓഫീസില്‍ പോകണമല്ലോ … ഇനിയും എഴുന്നേല്‍ക്കാന്‍ വൈകിയാല്‍ പരേഷിന്റെ ഫ്ലാറ്റ് വരെയും ഓടേണ്ടിവരും..

മനസ്സില്ലാ മനസ്സോടെ എഴുന്നേറ്റു ….

പരേഷിന്റെ കൂടെ കാറിലാണ് ഓഫീസിലേക്കുള്ള യാത്ര… കുളിച്ചൊരുങ്ങി അവിടേക്ക് നടന്നു..

എന്നും കണ്ടു മുട്ടാറുള്ള മുഖങ്ങള്‍ ..

ബാങ്കില്‍ ജോലിചെയ്യുന്ന കുടവയറന്‍ അങ്കിള്‍ …

സുന്ദരിയായ നോര്‍ത്ത് ഇന്ത്യന്‍ ചേച്ചി…

ഒരു കൈക്കുഞ്ഞുമായി  എന്നും ഉന്തുവണ്ടിയില്‍ എനിക്ക് മുന്‍പേ പോകുന്ന മറ്റൊരു ചേച്ചി…

അങ്ങനെ അങ്ങനെ …

ചൂട് പതിവിലും കൂടുതലാണെന്നു  തോന്നുന്നു . 2 മിനിറ്റ് നടന്നപ്പോഴേ വിയര്‍ത്തു തുടങ്ങി…5 മിനിറ്റ് കൂടി നടക്കണം പരേഷിന്റെ ഫ്ലാറ്റ്നു താഴെയെത്താന്‍… ആകെ കൊള്ളുന്ന വെയില്‍ ഈ 7 മിനിറ്റ് യാത്രയിലാണ് ..

Read More

ഞാനും എണ്റ്റെ കാറും

വര്‍ഷത്തില്‍ ഒരിക്കല്‍ കിട്ടുന്ന അവധി അതും എണ്ണി ചുട്ട അപ്പം പോലെ 30 ദിവസങ്ങള്‍തവണത്തെയാത്രയ്ക്ക്ഒരുപ്രത്യേകത്ഉണ്ടായിരുന്നു

10 – തീയതി ഞാന്‍ നാട്ടില്‍ വരും അതിനു മുന്‍പേ കാര്‍ വീട്ടില്‍ വന്നിരിക്കണം എന്ന് നിര്‍ബന്ധം പറഞ്ഞ്ഏല്പ്പിച്ചിരിക്കുന്നു

പറഞ്ഞതുപോലെ തന്നെ നാട്ടില്‍ എത്തിയപ്പോള്‍ വണ്ടി പോര്‍ച്ചില്‍ കിടക്കുന്നു…

അപ്പോഴാണ്‌ ഇത് ഓടിക്കാന്‍ കൂടി അറിഞ്ഞിരിക്കണമല്ലോ എന്ന ചിന്ത വന്നത്..

നാട്ടില്‍ കൂട്ടുകാരെല്ലാം ജോലിയായി തിരക്കിലും ..ആകെ ഉള്ളത് കല്യാണം കഴിഞ്ഞു മധുവിധു ആഘോഷിച്ച് കൊണ്ടിരിക്കുന്ന അനീഷ്‌ ആണ്.. വണ്ടി ഓടിക്കണമെങ്കിലും പഠിപ്പിക്കണം എങ്കിലും അവന്‍ വരണം … പക്ഷെ അവന്‍ വിരുന്നു ഉണ്നുന്നതിന്റെ തിരക്കിലും ….

അവസാനം ഞാന്‍ ഒരു തീരുമാനം എടുത്തു ഡ്രൈവിംഗ് സ്കൂളില്‍ ചേരാം എന്ന് .. അങ്ങനെ പഠനം തുടങ്ങി ..

കുറച്ച് ദിവസങ്ങള്‍ ആണ് നാട്ടില്‍ ഉള്ളൂ എന്നും പിന്നെ അത്യാവശ്യം പഠിച്ചു കഴിഞ്ഞാല്‍ സ്വന്തം വണ്ടി ഓടിച്ച്ചോളും എന്ന് തോന്നിയതുകൊണ്ടാണോ എന്നറിയില്ല ആശാന്‍ ഒരു മണിക്കൂറിനു പകരം 2 ഉം 3 ഉം മണിക്കൂര്‍ പട്‌പ്പിക്കുമായിരുന്നു..

അതോ ആശാന് ജീവനില്‍ പേടി ഉള്ളതിനാല്‍ പെട്ടെന്ന് കാര്യം അവസാനിപ്പിക്കാം എന്ന് കരുതി ആണോ എന്നും വര്‍ണ്യത്തില്‍ ആശങ്ക …

അങ്ങനെ ഒരുവിധം വണ്ടി റോഡിലൂടെ പോയി തുടങ്ങിയപ്പോള്‍ ആശാന്റെ കയ്യില്‍ ഗാന്ധിജിയുടെ നാലു കടലാസും വാരിയിട്റ്റ് ഞാന്‍ പോന്നു ..

ആശാന്‍ പഠുപ്പിച്ച ആദ്യാക്ഷരങ്ങള്‍ മനസ്സില്‍ ഓര്‍ത്ത് കാര്‍ സ്റ്റാര്‍ട്ട്‌ ആക്കി… ഫസ്റ്റ് ല്‍ ഇടും … Clutch ല്‍ നിന്ന് കാലെടുക്കും വണ്ടി ഓഫ്‌ ആകും… അങ്ങനെ പല പല ശ്രമങ്ങള്‍ക്കൊടുവില്‍ ഒരു വിധത്തില്‍ ഞാന്‍ വണ്ടി പോര്‍ച്ചില്‍ നിന്നിറക്കി…

ഇറക്കാനുള്ള എന്റെ ബുദ്ധിമുട്ട് ഞാന്‍ തന്നെ മനസിലാക്കി റോഡിലൂടെ ഉള്ള സാഹസം വേണ്ടെന്നുവെച്ച് തിരിച്ച് കയറ്റി ഇട്ടു…

അതും അതിലേറെ അഭ്യാസം ആയിരുന്നു….

ഇനിയും എങ്ങനാ ആശാന്റെ അടുത്ത ചെല്ലുക …അങ്ങനെ വീണ്ടും യാത്ര ബൈക്കില്‍ തന്നെ…

ദിവസങ്ങള്കടന്നുപോയി

പക്ഷെ ഇതിങ്ങനെ കിടന്നാല്‍ പോരല്ലോ.. വേറെ ഒരു വഴിയും ഇല്ലാതെ അനീഷിനെ തന്നെ വിളിച്ചു…

എടാ ഞാനും ഇവിടെ നിന്ന് ഒന്ന് മുങ്ങാനായി ഇരിക്കുവാ നീ വിളിച്ചത് നന്നായി …. ഇത്കേട്ടപ്പോള്‍ ഹോ ഇനിയെങ്കിലും പതിയെ കറങ്ങാന്‍ പോകാമല്ലോ എന്നോര്‍ത്ത്‌ എന്റെ മനസ്സില്‍ ഒരു ലഡ്ഡു പൊട്ടി…

അനീഷിന്റെ ശിക്ഷണത്താല്‍ കാര്‍ ഒരു വിധം ഓടിച് തുടങ്ങി..

ഒരു നാള്‍ ആലുവ വരെ പോകേണ്ടിയിരുന്നു ..അനീഷിനെ വിളിച്ചപ്പോള്‍ അവന്‍ പാലയില്‍ ഭാര്യവീട്ടില്‍ …

ഒറ്റക്ക് പോയാലോ എന്നൊക്കെ ഒരു അതി മോഹം തോന്നി .. പക്ഷെ ലൈസന്‍സ് ഉം ഇല്ല …

അനീഷിന്റെ ബാക്കി ( ഇരട്ടകളില്‍ ഇളയവന്‍ ) ബിനീഷിനെ വിളിച്ചപ്പോള്‍ അവന്‍ ഇന്ന് ഓഫീസില്‍ പോകാതെ എന്തുചെയ്യണം എന്നറിയാതെ ഇരിക്കുന്നു…

അവനെയും കൂട്ടി അലുവക്ക് വിട്ടു… ഒരു വഴിക്ക് പോകുന്നതല്ലേ എന്നോര്‍ത് ഒന്നുരണ്ട് ഫ്രണ്ട് നെയും വഴിയില്‍ നിന്ന് കൂടെ കൂട്ടി ..

അങ്ങനെ വല്യ തെറ്റില്ലാതെ പുക്കാട്ടുപടി വരെ എത്തി.. അവിടെ എത്തുന്നതിനു തോട്ടുമുന്പേ ഞാന്‍ ചോദിച്ചു ..

എടാ ഇതൊരു വല്ലാത്ത Junction ആണ് , നാലും കൂടിയ കവല… പോരാത്തതിന് നമ്മള്‍ക്ക്‌ പോകേണ്ട വഴിയില്‍ കയറ്റവും …

നീ ധൈര്യമായിഎടുക്ക് ഞങ്ങളൊക്കെ ഇല്ലേ ….. ഇത് കേട്ടപ്പോള്‍ എനിക്കും ആവേശം കൂടി…

പതിയെ Juction ല്‍ എത്തിയതും ഒരു ഓട്ടോ വട്ടം വെച്ചു

അവന്റെ ഭാഗ്യത്തിന് കാര്‍ എങ്ങനെയോ നിന്നു..

നിന്നതാണെങ്കില്‍ Wrong side ല്‍.. കയറ്റത്തിലും ….

നാട്ടില്‍ തെറ്റ് ആരുടെ എന്നതല്ലല്ലോ .. ആദ്യം ആര് ആരെ ചീത്ത വിളിക്കുന്നോ അവന്‍ ആണ് മാന്യന്‍ .. അവന്‍ എന്നെ തന്നെ ചീത്ത വിളിച്ചു …

കാര്‍ ഓടിച്ച് പരിചയം ഇല്ലാത്ത ഞാന്‍ ആകും തെറ്റ് കാണിച്ചതെന്ന് മനസ്സില്‍ ഓര്‍ത്ത് മിണ്ടാതിരുന്നു …

ഞാന്‍ വണ്ടി സ്റ്റാര്‍ട്ട്‌ ആക്കും … Clutch നിന്നു കാലെടുക്കും വണ്ടി നില്‍ക്കും..

നിശബ്ധമായിരുന്ന പുക്കാട്ടുപടി യില്‍ Horn മുഴക്കം മാത്രം …

പുക്കാട്ടുപടിയില്‍ ഒരു നിമിഷം കൊണ്ട് നാലുവഴിയും ബ്ലോക്ക്‌..

ഒരു ബസ്സ്‌ ആണെങ്ങില്‍ പുറകില്‍ … ഓട്ടോ ഡ്രൈവര്‍ ആദ്യം ഒക്കെ ദേഷ്യപ്പെട്ട്പറഞ്ഞു നോക്കി … എന്റെ ദയനീയത കണ്ട അവസാനം അയാള്‍ ചിരിച്ചു… ഞാനും …

ഞാന്‍ വണ്ടി Start ആക്കിയിട്ട് ഈ ബ്ലോക്ക്‌ തീരില്ല എന്ന് തിരിച്ചരിഞ്ഞിട്ടാണോ എന്നറിയില്ല ബിനീഷ് ഇറങ്ങി വന്നു വണ്ടിയുടെ സാരഥ്യം ഏറ്റെടുത്തു..

പിന്നെ തിരിച്ച് ഞങ്ങളുടെ പഞ്ചായത്ത്‌ എത്തിയിട്ടേ അവന്‍ കാര്‍ എന്റെ കയ്യില്‍ തന്നുള്ളൂ …

കാര്‍ എന്റെ കയ്യില്‍ കിട്ടിയപ്പോള്‍ എനിക്കൊരു ഐഡിയ തോന്നി..നേരെ കാളിയാറിനു പോയാലോ എന്ന് .. അവിടെ ചാച്ചന്റെ വീട്ടില്‍ പോകണം എന്ന് കുറെ ആയി കരുതുന്നു.. ഇതാണതിനുപറ്റിയ അവസരം എന്ന് ഞാന്‍ കരുതി ..

ബിനീഷിനും ജിബിക്കും 3 Star fecilities നല്‍കിയാലേ കൂടെ പോരു എന്ന് വാശി…

പിന്നെ പെരുമ്പാവൂരിനു മുന്പ് ഞാന്‍ വണ്ടി മറ്റാര്‍ക്കെങ്കിലും കൈമാറണം …

നിബന്ധനകള്‍ അന്ഗീകരിച്ച്ച് യാത്ര പുറപ്പെട്ടു..

പെരുമ്പാവൂരില്‍ ഇറങ്ങി ആദ്യത്തെ നിബന്ധന പാലിച്ചു…

Treat ന്റെ അനന്തര ഫലമായി “പെരുമ്പാവൂര്‍ വരെ ഓടിച്ച നീ തിരിച്ച് വീടെത്തുന്നത് വരെ ഓടിക്കും” എന്നായി ….

കാര്‍ ഓടികൊണ്ടേ ഇരുന്നു …..

കയറ്റവും ഇറക്കവും.. മരങ്ങളും… വിജനമായ പുല്‍മേടുകളും കടന്നു.. കാളിയാര്‍ അടുക്കാറായി…

ഒരു വളവുതിരിഞ്ഞതും .. അതാ പോലീസ് കൈ കാണിക്കുന്നു …

പെണ്ണൂകെട്ടാത്തതിനാല്എത്‌വഴിയും പോകാം ..തെക്കോട്ടും വടക്കോട്ടും നടക്കാം എന്നാ ലൈസന്‍സ് അല്ലാതെ വേറൊരു ലൈസന്‍സ് ഉം എന്റെ കൈയ്യില്‍ ഇല്ലാ …

ഇതൊക്കെ ചിന്തിച്ചപ്പോഴേക്കും വണ്ടി Engine ഇടിച്ച് റോഡരുകില്‍ തന്നെ നിന്നു..

ഒരു പോലീസുകാരന്‍ കാറിനരികില്‍ വന്നു സി. ഐ വിളിക്കുന്നെന്നു പറഞ്ഞു..

എന്നിട്ടൊരു ചോദ്യവും… കാര്‍ ഓടിച്ച് പരിചയം ഇല്ലാലെ എന്ന്….

3000 RS ഉം അങ്ങേരുടെ വായില്‍ ഇരിക്കുന്നതും കേള്‍ക്കേണ്ടി വരുമെല്ലോ എന്നോര്‍ത് പതിയെ ഇറങ്ങി പോലീസ് ജീപ്പിനു അരികിലേക്ക് നടന്നു..

എന്നോടൊപ്പം ജിബിയും കൂടി…

അവിടെ സി ഐ എന്നെപ്പോലെ ലൈസന്‍സ് ഇല്ലാത്ത ആര്‍ക്കോ പിഴ എഴുതി കൊടുക്കുന്നത് പോലെ എന്തൊക്കെയോ കുറിച്ച് കൊടുക്കുന്നു…

എവിടെക്കാണ്‌ എല്ലാവരും കൂടി ? സി ഐ ഞങ്ങളെ നോക്കി ചോദിച്ചു …

ഞാന്‍ പോകേണ്ട സ്ഥലവും വിവരങ്ങളും പറഞ്ഞു കൊടുത്തു..

വണ്ടിയില്‍ കുപ്പി വല്ലതും ഉണ്ടോ എന്ന് ചോദിച്ച് തീരുന്നതിനു മുന്‍പേ ജിബി ഇല്ലെന്നു തലയാട്ടിയിരുന്നു..

കാറില്‍ വല്ലതും ഉണ്ടോ എന്ന് നോക്കിക്കേ എന്ന് കാറിനരികില്‍ നില്‍ക്കുന്ന പോലീസ് കാരനോട് സി ഐ വിളിച്ച് ചോദിച്ചു ..

ഒന്നും കാണുന്നില്ല എന്നാ മറുപടിയില്‍ തൃപ്തനാകാതെ .. നീ അല്ലെ ഓടിച്ചത് നീ കഴിച്ചിട്ടുണ്ടോടാ എന്ന് എന്നോട് തിരക്കി ..ഞാന്‍ കഴിക്കില്ല എന്നു മറുപടിയും കൊടുത്തു .

എന്നാല് സീറ്റ്‌ ബെല്‍റ്റ്‌ ഇടാത്തതിന് ഒരു 100 രൂപ അടച്ചിട്റ്റ് പൊക്കോ… ഇവിടെ അടയ്ക്കുന്നോ അതോ കോടതിയില്‍ അടയ്ക്കുന്നോ?

ഇവിടെ തന്നെ അടച്ചേക്കാം …… RECEIPT ല്‍ എങ്കിലും എഴുതാനായി ലൈസന്‍സ് ചോദിയ്ക്കുമെന്നാണുകരുതിയത്..

ആ ധാരണയും അവര്‍ അവര്‍ തെറ്റിച്ചു..

100 രൂപയും അടച്ച് ഞാന്‍ തന്നെ ഓടിച് കാളിയാര് പോയി തിരിച്ചു വന്നു …

©Lajeev Kalappattil

ആ സ്നേഹ സമ്മാനം …..

സച്ചിന്റെ Ferrari ഇനി സൂറത്തിലെ മുതലാളിക്ക് സ്വന്തം.

ഏറെ വിവാദങ്ങള്‍ക്ക് വഴിതെളിച്ച ആ ചുവന്ന Ferrari മാത്രമായിരുന്നു ക്രിക്കറ്റിലെ ഈ മഹാ പ്രതിഭയുടെ ജീവിതത്തില്‍ അല്പം എങ്കിലും ഒരു ജനപിന്തുണ നഷടമാക്കിയത് ..

ജനരോക്ഷത്തെ തുടര്‍ന്ന് ആ തീരുമാനത്തില്‍ നിന്ന് പിന്മാറേണ്ടി വന്നതും ഒക്കെ പഴയ കഥ.

അത് എന്തും ആകട്ടെ..

ഒരാള്‍ സ്നേഹ സമ്മാന മായി നല്‍കിയ കാര്‍ വിറ്റത് അദ്ദേഹത്തോട് അനാദരവ് കാണിക്കുന്നതിന് തുല്യം അല്ലെ ?

ഉപയോഗിക്കുന്നില്ലെങ്ങിലും അത് മറ്റൊരാള്‍ക്ക് നല്‍കുക എന്നത് സച്ചിന്‍ എന്ന ഒരു നല്ല ക്രിക്കട്ടരെക്കാള്‍ ഉപരി നല്ല വ്യക്തിത്വത്തിന് ചേര്‍ന്നതാണോ ?

നമ്മുടെ കൊച്ചു കേരളത്തില്‍ പോലും നിത്യവൃത്തിക്ക് വകയില്ലാത്ത കായിക താരങ്ങള്‍ അവര്‍ക്ക് കിട്ടിയ മെഡല്‍ വില്‍ക്കാതെ അത് കാത്ത് സൂക്ഷിക്കുന്നു.

അവരുടെ മുന്നില്‍ സച്ചിന്‍ എന്ന പ്രതിഭ ചെറുതാകുകയല്ലേ ഇതുവഴി ചെയ്തത് ?

സച്ചിന്‍ എന്ന വ്യക്തിയെ ഇഷ്ടപ്പെടുന്ന അനേകരെ ഇത് വേദനിപ്പിച്ചുണ്ടാകാം ..

ആ വേദനയില്‍ ഞാനും പങ്കുചേരുന്നു..

©Lajeev Kalappattil

ഈ അവാര്‍ഡ്‌ കണ്ണ് തുറപ്പിക്കുമോ ?

മലയാളത്തില്‍ കേട്ടു കേള്‍വി ഇല്ലാത്ത ഒരു അവാര്‍ഡ്‌ പ്രഖ്യാപനം ആയിരുന്നു ഈ കഴിഞ്ഞ വാരത്തില്‍ നടന്നത്ന, മികച്ചതിനെ മാത്രം തിരഞ്ഞെടുക്കുമ്പോള്‍ മോശം പ്രകടനങ്ങളെ വിലയിരുത്തി ഡൂല്‍ ന്യൂസ് ഡോട്ട് കോം ഏര്‍പ്പെടുത്തിയ ഫിലിം ബോര്‍ അവാര്‍ഡ്‌ 2010 .

മോഹന്‍ലാല്‍ മോശം നടന്‍ … റീമ കല്ലിങ്കല്‍, അര്‍ച്ചന കവി മോശം നടി….

ഈ അവാര്‍ഡ്‌ പ്രഖ്യപിച്ചവര്‍ക്കും വിലയിരുത്തിയവര്‍ക്കും പോലും എതിരഭിപ്രായം ഉണ്ടാകില്ല മോഹന്‍ലാല്‍ ഒരു മികച്ച നടന്‍ അല്ലായെന്ന്.

മലയാളത്തിനു അവിസ്മരണീയ അഭിനയ മുഹൂര്‍ത്തങ്ങള്‍ സമ്മാനിച്ച അനശ്വര നടന്മാര്‍ അവരുടെ കഴിവിനും പക്യതക്കും ചേരാത്ത വേഷങ്ങള്‍ വെള്ളിത്തിരയില്‍ ആടി തിമിര്‍ക്കുമ്പോള്‍ ഇത്തരം ചില വിലയിരുത്തലുകള്‍ വേണ്ടി വരും … വരണം …

ഇവര്‍ക്ക് പറയാന്‍ ഒരുപാട് പഴയ കടപ്പാടുകള്‍ ഉണ്ടാകാം.

എത് പഴയ ബന്ധത്തിന്റെ പേരിലായാലും കഥയോ വേഷമോ നോക്കാതെ അഭിനയിക്കുമ്പോള്‍ അവര്‍ അറിയുന്നില്ല അവര്‍ ചെളി വാരി എറിയുന്നത് സ്വന്തം മുഖത്തേക്ക് തന്നെ ആണെന്ന് …

പുതിയ തലമുറക്ക് മാതൃക ആകെണ്ടാവര്‍ ഇങ്ങനെ ഒക്കെ കാട്ടി കൂട്ടുമ്പോള്‍ ജനം അഭിനയം നിര്‍ത്തണം എന്ന് മുറവിളി കൂട്ടിയില്ലെങ്ങിലെ അതിശയം ഉള്ളൂ…

മലയാള സിനിമയുടെ പ്രതിസന്ധിക്ക് കാരണം വ്യാജ സിഡികള്‍ ആണെന്ന് പറയുമ്പോഴും ഓരോ നിമിഷത്തിനും അതിന്റേതായ വില കൊടുക്കുന്ന ജനം ഈ കോമാളിത്തരങ്ങള്‍ കാണുവാന്‍ അതിനും മെനക്കെടാതെ വരും.

പുഞ്ചിരിക്കുന്ന മുഖവുമായി അവാര്‍ഡ്‌ വേദിയില്‍ എത്തുന്ന ഇവര്‍ ഈ അവാര്‍ഡ്‌ ഏറ്റുവാങ്ങുവാന്‍ എത്തിയില്ലെങ്ങിലും..

ഇത് അവരുടെ കണ്ണുകള്‍ തുറപ്പിക്കും എന്ന് കരുതി കാത്തിരിക്കാം …

©Lajeev Kalappattil

1 2 3